KHAWTHLIR

BEREMS hawng

Mizoram UPC hnuaia Education Board enkawl Bethani Residential English Medium School (BEREMS), Sihhmui chu nimin khan Mizoram UPC general superintendent Rev. P Lalrinawma'n a hawng. BEREMS-ah hian academic session 2025-26 aṭangin zirna kalpui a ni a; kg-I aṭanga class 4 thleng zirna awmin, thawktu pariatin zirlai mipa 36 leh hmeichhia 30 an enkawl mek a ni.

LLDMC/VLDMC training khar

Aizawl District Disaster Management Authority (ADDMA)-in Local/Village Level Disaster Management Committee (LLDMC/ VLDMC) member-te puala kar khat awh training a buatsaih chu nimin khan IPR Auditorium-ah khar a ni a; training-ah hian Tlangnuam RD Block chhunga VLDMC aiawhte leh AMC chhunga LLDMC aiawhte an tel. Training hi Aizawl district-a RD block hrang hrang VLDMC-te pualin buatsaih chhunzawm a ni dawn.

Civil Defence drive

Kolasib district bawrhsap Robert C Lalhmangaiha hoin nimin khan sorkar hotu ṭhenkhat te, sipai bang (ex-servicemen)-te leh NGO aiawhte'n Kolasib district-a civil defence volunteer kalpui dan tur leh Tiranga Yatra hman dan tur an rel a; Civil Defence enrollment drive kalpui ṭan ni se, Tiranga Yatra pual hian May 28, 2025-ah kawngzawha hun hman ni se, an ti.

Aizawl lei khar dawn

Aizawl Lei (bridge), MG Road, Upper Khatla-ah PWD Aizawl Road South Sub-Division III-te’n signage display siam hna an thawh dawn avangin lei hi naktuk (May 25), Pathianni zing dar 8 aṭanga tlai dar 4 thleng khar a ni dawn.

Kawng khar dawn

PWD, Aizawl Road North Division-te’n Zotlang Mara House kawng pengṭhuam siamṭhat hna an thawh dawn avangin vawiin leh naktuk hian chawhma dar 10 aṭanga tlai dar 5 thleng helai kawng hi lirthei tlan phal loha khar a ni dawn.