Hlawk zawka thlai leh thei thawn chhuah dan tur zirho

Lunglei DC Office leh Agricultural and Processed Food Products Export Development Authority (APEDA), Tripura chuan May 22, Ningani khan video conferencing hmangin APEDA kaltlanga Lunglei district-a kut hnathawktute thei leh thlai thar chhuahte ram pawna thawn chhuah dan leh APEDA hnuaia ruahmanna (scheme) hrang hrang zirhona an buatsaih.

Zirhonaah hian Lunglei district-a One District, One Product (ODOP) - balhla bakah, sawhthing, hmarcha, serthlum, thingfanghma leh dragonfruit-te chu thlurbing niin, ram pawna thawn chhuah tham thar chhuak tur leh dah ṭhat rei theih tura sawngbawl kawnga hmasawnna turte zirho a ni a; zawhna leh chhanna hun hman a ni bawk.

Lungleibawrhsap Navneet Mann chuan, kut hnathawktute thar chhuah thei leh thlai aṭanga thil siamte hlawk zawka zawrh/hralh a nih theih nan ram pawna thawn chhuah tlak leh thawn chhuah tham thar chhuah a pawimawh thu a sawi a; APEDA kaltlanga remchanna awm chu chhawr ṭangkai tum turin kut hnathawktute leh thil siam chhuaktute a chah.

He hunah hian DC office, Agriculture leh Horticulture department official-te, NEIDA, Lushai Agriculture Producer Company Ltd, Ṭawitlang Farmer Producer Company, Blue Mount Farming Society, Zotlang Self Help Group-II, Bawbawihi Food Processing leh RAFA Probiotic Juice aiawhte an tel a; ministry of Commerce & Industry hnuaia APEDA, Delhi deputy general manager Bidyut Kumar Baruah, Ministry of Agriculture & Farmers Welfare hnuaia Directorate of Marketing & Inspection (DMI), Guwahati marketing officer Ashok Yadav leh APEDA Tripura-a business development manager Joydev Roy-ten thu an sawi bakah, thil pawimawhte an zirtir nghal a ni.