FCSCA Minister-in bottling plant chei ṭhat hna thawh mek a enfiah

Food Civil Supply & Consumer Affairs (FCSCA) minister B Lalchhanzova chuan nimin khan Mualkhang Gas Botling Plant construction site leh Sairang Dinthar Venga buhfai kudam sak mek a tlawh a, hnathawh dan a enfiah. Tuirial bialtu MLA K Laldawngliana leh official-te'n an ṭawiawm.

Mualkhang Gas Botling Plant hi kum 2006 khan Rajiv Ghandhi Five Year Plan hnuaiah Indian Oil Corporation Limited (IOCL) kaltlanga din a nih thu sawiin FCSCA Minister chuan, "Sorkar hmasaten theihtawp chhuahin hma an la a, ṭangkai taka hman niin nitin gas bur 2500 vel helai hmun aṭang hian pek chhuah ṭhin a ni. January 20, 2020 khan Mualkhang Gas Botling Plant hi tih tawp a lo ni ta a, a chhan ber chu gas bullet (gas dahkhawlna thir bawm) te hi a thir a pan tak em avangin Petroleum Explosive Safety Organisation (PESO) lamin hman chhunzawm phalna lisence an pek chu an ti tawp tak vang a ni," a ti.

B Lalchhanzova chuan Mualkhang Gas Botling Plant tharthawh leh a nih theih nan Mizoram sorkar chuan theih tawpin hma a la tih sawiin, "Kalphung thar mipui sorkar hnuaiah pawh chak takin hmalak chhunzawm a ni a, helai hmun dinthar leh nan hian cheng vbc. 225.71 chu IOCL in a sanctioned a, January 2025 aṭangin hna tan a niin, December 2027 a zawh fel tura ruahman a ni. Zawhfel a nih hunah chuan nitin Gas bur 7500 vel helai hmun atang hian pek chhuah theih beisei a ni," a ti a, IOC lamin ram an mamawh belh hectare 1.8 pawh Revenue department-in rang taka ngaihtuahsakin, February 2024 khan land lease pawh kan tifel tawh a nih thu a sawi.

A theihtawpin an ngai pawimawh tih sawiin FCSCA Minister chuan, "Sorkar kan in thlak fo a, kan hun lai ṭheuhin mipui tan theih tawp kan chhuah tur a ni tih hi kan thupui a ni a, mipui tan a nih avangin he hmalakna hi chak takin kan kalpui mek a ni. He botling plant enkawltu deputy manager Z Lhungdim hmalakna zarah tunah hian helai hmun tharthawhna tura ṭul zawng zawng pawh clearance kan ti fel tawh a, kan zawh hunah chuan Mizo ṭhalai engemaw zatin helai hmunah hian hna thawh tur an nei dawn a ni," a ti.

FCSCA Minister hian Sairang Dinthar Venga an department-in buhfai kudam pathum an sak mek, July 17, 2025-a zawh tura ruahman pawh tlawhin, hnathawh dan a enfiah. Kudam pathum sakna atan hian NABARD aṭangin cheng nuai 440 leh SASCI aṭangin cheng nuai 971 hmuh a ni a, buhfai qtl. 35,000 leng thei tura ruahman a ni.

Minister hian Sairang Dinthar Venga Supply Department in Buhfai Kudam pathum an sak mek, july ni 17, 2025 a zawh tura ruahman chu a hmunah a tlawh bawk a. Heng Godown pathum sak nan hian NABARD atangin 440 Lakhs leh SASCI atangin 971 Lakhs hmuh a ni a, 35000 qtls leng thei tura ruahman a ni.