Helen Lowry HSS-in zirlai tiṭhate chawimawi; Rilru put hmang dik neih a pawimawh - Prof. Nitea

Helen Lowry Higher Secondary School chuan nimin khan an auditorium-ah HSLC leh HSSLC examination 2025-a an zirlai tiṭhate chawimawina, 27th Graduation Commemcement Programme an buatsaih a; minister of state Prof. Lalnilawma'n hmanpuiin, hlawhtlinna chang zel turin zirlaite chuan rilru put hmang dik an neih a pawimawh thu a sawi.

Prof. Lalnilawma chuan, zirlai pass tharte chu an hma hunah hlawhtlinna chang zel tura duhthlanna dik siam zel turin a chah a, "Hlawhtlinna chang zel turin rilru put hmang dik (positive attitude) neih tum tlat zel ula, vawiina in duhthlanna hian nakin thlenga in dinhmun tur a hril tih hre reng ang che u," a ti a, zirlaite hlawhtlinna phena zirtirtute inpekna chu fakawm a tih thu a sawi.

Khualzahawm Seventh Day Mizo Conference education director Lalnilawma Colney pawhin thu sawiin, zirlaite chu chhia leh ṭha hriatna thiang tak hmanga duhthlanna dik siam ṭhin turin a fuih.

He hunah hian zirlai pass tharte hnenah certificate sem niin, zirtirtu leh zirlai ṭha zualte hnenah chawimawina hlan a ni.