SDO (Civil)-te revenue court atan hman a ni dawn - Revenue Minister

Land Revenue & Settlement (LRS) minister B Lalchhanzova chuan SDO (Civil)-te chu revenue court atan leh sub-registration office atan puan a nih tawh angin, Vairengte SDO(C) chu bul ṭan nan hman tum a nih thu a sawi.

Minister B Lalchhanzova hian May 24, Inrinni khan Vairengte tlawhin, Vairengte SDO(C) pisaah Vairengte khawtlang hruaitute a kâwm a; "LRS department-in mipuite hnena inhnuh hnaih a tumna kal zelah civil sub-division-te hi thuam chak tum a ni. Vairengte hi ramria awm a nih ang leh SDO Civil office changtlung sa a nih avangin hmalakna hmasaah neih kan tum. SDO(C)-te hi revenue court-a atan leh sub registration office atan puan an ni tawh a, hei hi a taka kalpui a nih theih nan department chuan chak takin hma a la a ni," a ti.

Vairengte SDO(C) pisaah surveyor, revenue inspector, DEO leh clerical staff-te a theih anga dah thuai tum a nih thu sawiin B Lalchhanzova chuan, "Hei hi ram teh kawngah te, ram buai chinfelah te, ram hming thlak leh dahkhamahte mipuite'n hun leh sum tlem zawk sênga thil an tih theih phah dawn," a ti a; ZPM sorkarin a tum - mipui awlsamna siam kawngah hmasawnna nasa tak a thlen a beisei thu a sawi.

LRS Minister chuan, Revenue Secretary, Director, Kolasib DC leh SO-te nen kokim zawka he hmalakna kalpui dan tur sawiho tura ṭhutkhawm leh vat a nih dawn thu leh, hmalakna chu district dangah pawh a tahtawla la tih zel tur a nih thu a sawi bawk.