Mizorama Kristmas kan lawm dan hi ram pawna zawrh tlak a ni - Tetea Hmar

Minister of state Lalnghinglova Hmar chuan May 24, Inrinni khan Bharat Mandapam, New Delhi-a sumdawng liante intawh khawmna, Rising Northeast Investors Summit-ah thu a sawi a; Mizorama Kristmas lawm dan chu khualzin hîpna atan ram pawn thlenga tihlâr leh zawrh tlak a nih thu a sawi.

Lalnghinglova Hmar hian 'Northeast: The New Hub of Tourism and Hospitality' leh 'Unleashing the Potential of Entertainment and Sports in Northeast' tih thupui sawihonaah thu a sawi a, "Mizoramin theihna a neih thu sawi ringawt kan duhtawk tawh lo a, a taka chantir tumin theihtawpin hma kan la mek. Mizorama Kristmas kan lawm dan, a bikin veng tin khaw tina ruaiṭheh ang hi hmun danga awm ve lo a, ram pawn thlenga tihlar leh zawrh tlak a ni," a ti.

Hmarchhak state chu hmun kilkhawr a ni tawh lo tih sawiin Lalnghinglova chuan, "Mizoram pawh Delhi aṭangin darkar hnih leh a chanveah a thlen theih a, Kolkata aṭangin minute 45 chauh a ni. Aizawl bul thleng rél a luh tawh dawn avangin investor-te tan remchanna a inhawng dawn. ASEAN ramte nena inhnaih leh inkalpawh awlsam a ni," a ti a; Act East Policy hlawhtlinna atan pawh hmun pawimawh a nih thu a sawi.

Lalnghilova Hmar chuan, Mizoramin tourism, sport leh entertainment lamah theihna sang tak a neih thu leh a taka chantir turin theihtawp chhuah a nih thu a sawi a; investor-te chu Mizoram leh hmarchhak state lam hawi turin a sáwm a ni.