Mi 596-in UPSC CSE an hmachhawn

Union Public Service Commission (UPSC) chuan nimin Pathianni khan India ram pumah Civil Services Examination (CSE) preliminary examination a buatsaih a; Aizawl centre-ah pawh hmun pathumah exam buatsaih niin, mi 596 an inlan.

Kumina UPSC Civil Services Exam-ah hian Mizoram bikah chuan application thehlut, Prelims exam hmachhawn thei tura pawm mi 1,027 an awm a; chu'ng zinga mi 596 chuan nimin chawhma lam khan exam an hmachhawn a, mipa 401 leh hmeichhia 195 an ni.

UPSC CSE exam-na atan hian Mizoram Public Service Commission exam hall, Mizo High School leh Hrangbana College te hman a ni a; chawhma lamah General Studies Paper-1 exam niin, chawhnuah General Studies Paper-2 (Civil Services Aptitude Test) exam a ni.

Mizo zingah Mizoram páwna UPSC CSE hmachhawn an awm nual nia thu dawn a ni bawk.