Union minister George Kurian a lo zin

Fisheries, Animal Husbandry & Dairying minister of state George Kurian chu Aizawla zan khat riak turin May 24, Inrinni khan a lo thleng a; Aizawl a pan hmain Lengpuia mimal sangha dilte leh North Eastern Council (NEC) hnuaia Fish Farmers' Training Centre dinna tur Laldenga Fisheries Demonstration Farm a tlawh.

George Kurian hian Lengpuia Fish Farmers' Training Centre dinna tur Laldenga Fisheries Demonstration Farm a tlawhnaah hmalak tum zel dante a enpui a; Fisheries minister Lalthansanga leh department hotute'n Mizorama sangha khawitute harsatnate thlenin, sangha khawi lama hmasawnna tura sorkar laipuia project an thehluh tawhte chu pawm thuai a nih theih nan hma la turin an ngen.

Union Fisheries Minister chuan, sangha khawitute sum lama harsatna sutkianna atan Fish Farmers Producer Organisation (FFPO) hnuaia Equity Grant a kawhhmuh a; Mizorama sangha khawitute outreach programme neihpui turin central aṭangin officer a tirh tur thu a sawi.

George Kurian hian May 24 vek khan Khatlaa Ornamental Fish Rearing Unit dinna tura Pradhan Mantri Matsya Samapada Yojana (PMMSY) scheme hnuaia ṭanpuina dawng tura thlan Sales Outlet a tlawh bawk.