CM thu sawiah eng ber nge âwih tur mipuiin an hre lo - John Rotluangliana

Mizoram Pradesh Congress Commit­tee (MPCC) hruaitu John Rotluangliana, Congress sorkar laia minister chuan nimin khan Congress Bhavan-a inkhawm­ah thu sawiin, chief minister Zoram­thanga thu sawiah eng ber nge âwih tur tih mipuiin an hre thei lo niin a sawi.

John Rotluangliana chuan, MNF sorkar chu kum khat chuang an kal tawh tih sawiin, chumi chhung chuan thu leh hla ngah viau mah se, a taka tihhlawhtlin erawh an nei lo niin a sawi a, "CM Pu Zoramthanga pawhin buaipui ber tur a hre lo a, an sorkar hmasakah lei verh a tuipui a, tun ṭuma an sorkar tirh khan kawng chhâwng a sawi nasa leh viau a, a hlawhtlin tak tak hmain cable car a buaipui leh daih. A thusawiah hian eng ber hi nge awih tur tih mipuiin kan hre thei lo," a ti.

Mau chíng tur thlan chungchangah MNF party worker-te an intibuai nasa nia sawiin John Rotluangliana chuan, "Mau chìnna tura an thlan khaw ṭhenkhatah phei chuan an thlan chhuahte zingah MNF party mi an tam vak loh avangin an thlang ṭha leh ringawt a ni," a ti a; MNF party worker-te chuan mau chìn tak tak aiin, a chìnna tur pawisa dawn chiah an thlahlel niin a sawi. MNF sorkarin MLA fund a pe chhuak hleithei lo a, SEDP-ah cheng nuai thum sem tura an tih pawh an sem thei lo tih a sawi bawk.