Mizoram leh Union sports minister-te inkâwm
Sorkar laipui hotute dawra New Delhi-a chám mek Sports & Youth Services minister Lalnghinglova Hmar chuan nimin khan Union Youth Affairs & Sports minister Dr Mansukh Mandaviya a chennaah a kâwm a; Mizoramin infiamna leh kut themthiamna tihhmasawn (skill development) kaih kawp a tum chungchang leh football hmunhma tihhmasawn dan tur an sawi dun.
Lalnghinglova Hmar chuan, sport coaching leh training chu skill inzirtirna pawimawh tak a nih angin, Mizoramin skill development leh sport kai kawp turin hma a la mek tih a sawi a, "Hemi atan hian Ministry of Skill Development & Entrepreneurship hnuaia Sports, Physical Education, Fitness and Leisure Skills Council (SPEFL-SC) kaltlangin project thehluh tawh a ni," a ti a; MSDE Minister leh Secretary bakah SPEFL-SC CEO-te nen pawh an thlirho tawh thu a sawi.
Union Sports Minister leh Mizoram Sports Minister hian project proposal an thlir dun a; Dr Mansukh Mandaviya chuan, pilot project anga kalpui thuai theih ni se a duh thu sawiin, MSDE minister Jayant Chaudhary pawh a sawipui tur thu Lalnghing-lova Hmar a hrilh.
Lalnghinglova Hmar-in hmarchhak leh Mizoramin infiamna lama hma a sawn theih nan corporate liante thlun zawm a ṭhat thu a sawi chungchangah Dr Mandaviya chuan hmalakpui a tiam a ni.
Sorkar thuchhuah tarlan danin, infiamna leh kut themthiamna kaih kawp hi Mizoram sorkarin Olympic 2036 Vision a neih hnuaiah kalpui tum a ni. Coach-te tan training of trainers buatsaih te, sorkar sikula physical education zirtirtute training peka physical education mumal tak kalpui te, state pum huapa naupang zawkte tan sports coaching leh talent zawn chhuah kalpuite a tel.
LESDE minister ni bawk Lalnghinglova Hmar hian nimin vêk khan Ministry of Skill Development and Entrepreneurship secretary Atul Kumar Tiwari chu a pisaah a kâwm a; infiamna leh kut themthiamna tihhmasawn lam kaih kawpna tur ruahmannaah belh leh siamṭhat ngai laite an sawi dun a ni.