ṬBCC aṭanga tun hnaia chhuak zingah drugs overdose-in mi 10 an thi tawh

Social Welfare minister Lalrinpuii hoin nimin khan Aijal Club-ah 'Review Meeting on Nasha Mukt Bharat Abhiyaan' (Ruihhlo Do) neih a ni a; Ṭawngṭai Bethel Campuing Centre (ṬBCC) aṭanga tun hnaia chhuak zinga mi 10 chu drugs overdose vangin an thi tawh tih tarlan a ni. Minister chuan, State Drug Policy nei turin hma an lak mek thu a sawi.

Ṭhutkhawma tarlan danin, ṬBCC aṭangin tun hnaiah mi 928 an chhuak a, chu'ng zinga mi 10 chu damdawi ruihhlo (drug) overdose (OD) vangin an thi tawh. Ruihhlo ngai enkawlna centre/home ṭhenkhatah ruihhlo ngaite enkawl tura thiamna nei (expert) leh damdawi lam thiam an awm ṭha tawk lo.

District aiawhte'n an report chinah damdawi ruihhloa inchiu ṭhin (injecting drug user) Lawngtlai district-ah mi 813, Champhai district-ah mi 1,294, Saitual district-ah mi 300, Hnahthial district-ah mi 443 leh Mamit district-ah mi 1,033 an awm mek.

Social Welfare Minister chuan, ruihhlo do danah tun hma zawng aiin tunah beihpui thlak nasat a nih thu leh a rah chhuah hmuh tur a awm thu a sawi a, "India ram state-te min nghawng dan a inan loh avangin sorkar laipuiin khairual taka scheme leh puihna a siamte a duhkhawpawm loh hle a, ruihhlo donaah sorkar lama hnárkaitute awmze nei zawka kan ṭan rual a pawimawh. Community hman ṭangkai hi tihlen chho tum a ni a, ruihhlo ngaite enkawlnaah a dam/nghei tawhte hi stakeholder pawimawhte zinga mi an ni," a ti.

Ruihhlo ngaite enkawlna hmun tana Accreditation Rules chu an peih a ni ṭêp tawh tih sawiin Lalrinpuii chuan, "Accreditation hi siam ni tawh mah se, hremna dan a awm loh avangin kan siamṭha leh mek a, State Drug Policy nei turin hma kan la mek bawk. Social Welfare department hian ruihhlo la ti ve lote venhim nan kan budget neih ang tâwkin hma kan la ṭhin," a ti a; ruihhlo ngai enkawltute pualin ṭum eng emaw zat training buatsaih a nih tawh thu a sawi.

Social Welfare Minister chuan, Mizoramah ruihhlo ngai enkawlna centre/home 44 a awm mek thu a sawi a, "Kohhran enkawl pariat leh sorkar (SWD) enkawl pahnih bak zawng chu mimal leh pawl enkawl a ni a, heng zinga 11 hi sorkar laipui aṭanga ṭanpuina dawng, IRCA centre a ni," a ti.