Civil Hospital, Aizawl-in MJA member-te hriselna dinhmun a thlâwnin an enfiah ṭan

Civil Hospital, Aizawl (CHA) chuan nimin aṭang khan Mizioram Journalists' Association (MJA) General Headquarters-a member-te tan hriselna dinhmun a thlawna enfiahna, Free Health Check-up an buatsaih ṭan a, Health & Family Welfare minister Lalrinpuii'n a hawng.

Free Health Check-up for MJA Members hawnna hi CHA Doctor's Seminar Room-ah buatsaih a ni a, CHA senior medical superintendent Dr Lalchhuankimi'n a kaihruai. Minister Lalrinpuii chuan, natna inkai chhâwn theih loh chi hrang hrangte chu Mizote suattu pakhat a nih thu sawiin, "Kea kal tam a pawimawh. Ram changkangah kea kal an uar em em. Kan kal tam poh leh a nuam ṭhin a, kea kal hi tih hram hram a ṭha," a ti.

Lalrinpuii chuan, chawhruala Mizote dam rei zawng a rei lutuk lo tih sawiin, chu chu ṭhalai thi an tam vang nia a lan thu a sawi a, "Taksa enkawl ṭhat a pawimawh tak zet a, regular taka check-up kan tih ṭhin a pawimawh," a ti a; hriselna leh dam ṭhatin chhungkua a nghawng tih hre turin kal khawmte a chah.

HFW Minister chuan, Mizoram Universal Healthcare Scheme (MUHCS) thar chu Mizoram mipui tan a ṭha tak zet tih sawiin, "Mi zawng zawng tan pawisa pek ngai loa inenkawl theihna a ni. Accident vanga emergency-a MUHCS zawm lo damdawi-ina luh pawhin darkar 48 chhungin report tur a ni a, reimburse leh theih a ni," a ti. MUHCS hnuaiah awlsam zawkin phaia inthawn dan siam a ni a, specialist doctor-in an refer nghal theih thu leh phai lamah mi 260 refer a nih tawh thu a sawi.

Mizorama sorkar damdawi-inte tihchangtlun mek a nih thu sawiin Lalrinpuii chuan, "CHA kan tichangtlung tial tial. Cath lab (catheterisation laboratory) sak mek a ni a, an zo ṭêp tawh a, zawh a nih hunah angiography leh stent vuahte tih theih a ni dawn. Kidney transplant (kal thlak) pawh kan ti thei ṭêp tawh," a ti.

Health Minister chuan, ZMCH-ah lung (heart) zai theihna tur buatsaih mek a nih thu leh thluak zai theihna siam tum mek a nih thu a sawi a; Mizo doctor-te an thiam tâwk a, an rintlak tâwk thu a sawi bawk.

MJA president C Lalrambuatsaiha pawhin thu sawiin, kum 2009 aṭangin CHA-in MJA member-te tan a thlawna hriselna dinhmun enfiahna tih ṭan a nih thu a sawi a, "Hetianga free health check-up min buatsaihsak ṭhin hi kan tan a hlu em em a, CHA hotute leh thawktute zawng zawng chungah kan lawm tak zet a ni," a ti.

CHA Senior Medical Superintendent sawi danin, MUHCS hnuaia CHA-ah 3,101 enkawl an ni tawh a, chungte chu PMJSY hnuaia mi 2,370, mipui náwlpui pawisa (premium) thawhtu mi 377, sorkar hnathawk 210 leh sorkar hnathawk pension tawh mi 144 an ni.

MJA member-te tana Free Health Check-up-ah hian MJA Gen.Hqrs hnuaia MJA member-te chu a tahtawlin a thlawn vekin an hriselna dinhmun endik chhoh a ni dawn a ni.