Excise & Narcotics-in 2025-ah heroin kg. 26.415 an man tawh

Excise & Narcotics department (END) leh Central YMA hnuaia Ruihhlo dotu Central Anti Drugs Squad (CADS) chuan May 25-26, 2025 chhung khan ruihhlo eng emaw zat an man a; kumin 2025-ah nimin thleng khan END-in heroin kg. 26.415 an man tawh.

END leh CADS thawk dun chuan May 25, Pathianni zan dar 7:40 khan Phunchawngah heroin gram 549 (hawng 50) leh a neitua puh mi pahnih - C Lalramnunmawii (37) d/o C Lalremliana, Chanmari West leh Lalnunmawia (35) s/o Lalhmangaiha, Tuikual North nia inchhálte an man.

Heroin gram 549 an man an chhuina kal zelah Pathianni zan zanlai pelh hnu dar 1 khan Luangmual Industrial Complex-ah heroin kg. 1.549 (hawng 140) leh Methamphetamine kg. 9.817 an man leh a; ruihhlo phurhna atana hman lirthei TATA Yodha MZ-01 AB-4110 leh ruihhlo thila indawrna atana hman mobile phone pahnih an hrensak bawk.

END chuan kumin January 1 aṭanga nimin thleng khan heroin kg. 26.415 leh meth-amphetamine kg. 67.179 an man tawh a ni.

END RUIHHLO MAN ZAT
(January 1 - May 26, 2025)

1. Heroin kg. 26.415

2. Methamphetamine kg. 67.179

3. Crystal meth kg. 48.061

4. Ganja kg. 132.983

5. Opium gram 945

6. Khuh damdawi phial 1,748

7. Alprazolam mûm 23,572

8. Tramadol mûm 2,033