KHAWTHLIR

CADS ruihhlo man

Central YMA hnuaia ruihhlo dotu Central Anrti Drug Squad (CADS) chuan May 17-23, 2025 chhung khan heroin (no. 4) hawng 22 leh Tictac bûr 68 an man. Heroin man kaihhnawihah hian mi 40 an man a; chu'ng zinga paruk chu Excise & Narcotics department hnenah hlanin, mi pathum chu home/centre-ah an dah a, mi 20 chu counselling pek an ni.

Health centre hawng

Health & Family Welfare minister Lalrinpuii chuan May 24, Inrinni khan Ramhlun North Health Centre thar a hawng a, thawktu tur sorkarin a ngaihtuah dawn thu a sawi. Health Centre sak nan hian sorkar aṭangin Rs 2,90,000 hmuh a ni a, bialtu corporator C Lalchhandami'n Property Tax Return aṭangin Rs 4,00,000 a pe. Minister Dr Vanlalthlana, bialtu MLA chuan health centre hmanrua tur a theih ang anga ngaihtuah a tum thu leh Hemoglobin (HB) endikna hmanrua a pek tur thu a sawi.

Traffic SP thar

Aizawl Traffic Police SP tura ruat Ruatsanga Ralte chuan nimin khan Traffic SP hna a thawk ṭan a, Aizawl khawpui traffic thunun leh dan kenkawh kawngah ngaihtuahna thar sêng tlang turin a thawhpuite a sáwm. Ruatsanga Ralte hi Police Training School, Thenzawl principal aṭangin Traffic SP tura ruat a ni a, 1st IR commandant Lalthakima Ralte chu PTS principal a ni thung ang.

Kawng chhak lamah lirthei dah phal loh

Ngaizel khâm pheia lung tla ṭhin laka mipui leh lirthei tlante an him theih nan Aizawl SP chuan thupek a tichhuak a; Lalnghakliana Filing Station aṭanga R Lalchhuanawma in inkar kawng chhak lamah lirthei eng chi mah dah phal a nih loh thu leh, lirthei tlân tikhaihlak thei thil dang dah phal a nih loh thu a tarlang. Lung/lei tla a awm palha lirthei tlante rang taka an inthiar fihlim theih nan inhlat thei ang bera tlân turin lirthei khalhtute a chah bawk.