Mizoram chhim lamah airport din turin CM-in Union Aviation Minister a ngen

Chief minister lalduhoma chuan nimin khan Civil Aviation minister Ram Mohan Naidu a pisaah a kâwm a; Mizoram chhim lamah airport din tura a ngen bakah, Airport Authority of India (AAI) hnena Lengpui Airport hlan chungchang a sawipui.

Ram Mohan Naidu chuan, Mizoram chhim lamah airport siam a nih theih nan hma a lak tur thu a sawi a; inkawmnaa tel ve AAI hotute chu a rang lama Mizoram sorkar hnena Lengpui Airport an enkawl theih dan tur siam turin a ti bawk.

Lengpui Airport enkawl dan turah AAI-in an ruahman ang a, chu Mizoram sorkarin a lo zir chiang leh phawt dawn tih sorkar thuchhuahin a tarlang.

CM Lalduhoma hian May 25, Pathianni khan Development of North Eastern Region (DoNER) minister Jyotiraditya Scindia pawh Delhi-a a chenna inah kâwm a; DoNER hnuaia Global Model Site atan Thenzawl thlan a nih avanga a lawm thu a hrilh. Thenzawl Golf Course chu international standard-a siamna tur ruahmanna kal mek a sawipui a; Jyotiraditya Scindia chuan a lo bawhzui tur thu a sawi.

DoNER Minister chuan, Mizorama thlai thar, a bikin sawhthing leh Mizo hmarchatê hralhna bakah, infiamna lam tihhmasawnna turin Mizoram chu theihtawp a chhuahpui tur thu a sawi a; Mizoram hmachhawp hrang hrangte sawiho a ni bawk.

Chief Minister hi Sports leh Tourism enkawltu minister Lalnghinglova Hmar, Lok Sabha MP Richard Vanlalhmangaiha leh OSD to CM R Lalrodingi ten an ṭawiawm.

May 25 tlai khan CM Lalduhoma chuan Minority Affairs minister Kiren Rijiju chu New Delhi-a a chenna inah a kâwm bawk a; Mizorama Pradhan Mantri Jan Vikas Karyakram (PMJVK) project pawimawh zualte en dunin, hmalak zel dan tur an sawi dun a ni.