Ruihhlo ngai enkawl lailawkna tur short stay center din a ni dawn

Ruihhlo ngaite enkawl lailawkna tur, short stay center (SSC) din a ni dawn a; hmalak dan tur ngaihtuahtu tur Core Committee leh Task Group din tur niin, hma la turin Social Welfare department ruat a ni.

Mizorama ruihhlo ngaite enkawlna home/centre hrang hrang leh an tun dinhmunte chungchangah May 26, Thawhṭanni khan Aijal Club-ah Social Welfare minister Lalrinpuii hoin inrawnkhawm a ni a; SSC din an rel bakah, kalpui dan tur leh enkawl zui dan turte leh hmalak dan tur ngaihtuahtu tur Core Committee leh Task Group-te din ni se an ti.

Inrâwnkhawmnaah hian Aizawl Municipal Corporation, Aizawl DC office, Hospital and Medical Education, MSACS, Excise & Narcotics department, IPR department, Nursing, Ayush, Mizoram Home Guards, Aizawl SP, MPRO leh Mental Health hotu te, Druggist & Chemists Association, FINGODAP, Mizoram Psychological Association, Mizoram Professional Social Workers Association, SHALOM leh Synod Hospital aiawhte an tel a ni.