KHAWTHLIR

Mi 25 hnenah ar sem

College of Veterinary Sciences and Animal Husbandry, Selesih chuan nimin khan Ṭhuampui YMA Committee Room-ah 'Techno Economic Empowerment of Poultry Farmers in NE Region of Mizoram' hnuaiah rainbow rooster ar an sem a; hei hi BJP Mizoram president Vanlalhmuaka leh general secretary Lalthangmawii te hmalakna a nih thu BJP chuan an tarlang. Chhungkaw 25 hnenah ar sem a ni.

Electric bill

Power & Electricity department chuan thuchhuah siamin, electric bill pek hun May 29, 2025 thleng pawhsei a nih thu an tarlang. Electric billing software thar hman a nih avangin hmun ṭhenkhatah electric bill sem chhuah hun a tlai thu tarlangin, "Mipuite'n electric bill pekna hun tam zawk kan neih theih nan May thla electric bill pek hun (due date) tawp atana May 27, 2025 bituk tawhte chu May 29, 2025 thleng pawhsei a ni," an ti.

Serchhip district-a sawhthing hralh zat

Bána Kaih (Handholding) scheme kaltlangin Serchhip district-a sawhthing SCC pasarih - Chhiahtlang, Thenzawl, Chhingchhip, Khawlailung, East Lungdar, Lungpho leh North Vanlaiphai-ahte sawhthing quintal 34,027 hralh a ni tawh. Sawhthing hralh tawhte chu thawh khatnaa hralh qtl 8,845 leh thawh hnihna kal meka hralh qtl 25,182 a ni.

Kawngpui sirah lirthei dah phal lo

Traffic SP Ruatsanga Ralte chuan nimin khan hriattirna chhuahin, zing dar 8:00 - 9:30 inkarah Mission Veng biak-in leh Mission Vengthlang kâwn inkar kawngpui dung leh, Mission Venga SR Vala Road kawngpui dungah kawng sirah lirthei reng reng dah phal a ni lo tih a tarlang.

Electric connection endik a ni dawn

Power & Electricity department chuan June 9, 2025 aṭangin electric connection endik rûnpui an nei dawn a, consumer-te chu electric an hman/pawh danah felhlel a awm a nih chuan siamṭha turin an ngen. PE department aṭanga ID neite chauh endiktir tur leh ṭha taka endik a nih theih nana ṭawiawm tuin mipui an ngen bawk.