MZP-in hlawhtlingte chawimawina hlan

MZP General Headquarters chuan nimin khan an conference hall-ah MZP chhungkuaa mi hlawhtlingte leh exam-naa hlawhtlingte hnenah lawmpuina an hlan.

MZP-in lawmpuina an hlante chu - MZP chhungkua aṭangin Thenzawl MZP president hlui B Lalchhanzova, minister of state; MZP Gen. Hqrs vice president hlui Dr C Lalremruata, doctor of philosophy (honorius causa); Sesawng MZP secretary hlui leh MZP Gen. Hqrs hruaitu hlui Lawrence Lalhlanthara, MCS leh MZP Gen. Hqrs hruaitu hlui Lal-chhuanawma Ralte, MCS te an ni.

Exam-naa hlawhtlingte zingah - UPSC CSE 2024-a 543-na Carolyn Chingthianmawi leh 999-na Jerry Lalhratthang Buongpui te, UPSC, Combined Defence Services (CDS) 2024(II)-a 304-na Andy L Khobung leh, Mizoram HSLC 2025-a pakuana Mary Sui te lawmpuina an hlan. Book of the Year 2024 ziaktu F Vanlalrochana lawmpuina an hlan bawk.

MZP president H Lalthianghlima chuan, MZP chhungkua aṭanga civil service-a inziak tlingte leh kawng hrang hranga hlawhtlinna chang lawmpuina hlan tur an awm chu lawmawm a tih thu a sawi.

Minister of state B Lalchhanzova pawhin thu sawiin, Mizote chu Pathianin ropui taka a siam an nih thu a sawi a, "Zo fate hi khawi hmunah pawh dinhmun pawimawh leh sang tak chelh thei tura din kan ni. Zirnain mihring a siam puitling a, a chher hriam a, taima taka hma lam hun atan kan inbuatsaih a, engkim hmachhawn thei tura kan inbuatsaih a ngai a ni," a ti.