Kum upate leh ruihhlo ngaite pualin Mental Health Clinic & Camp buatsaih

Social Welfare department leh National AYUSH Mission chuan nimin khan Dawrpui Multipurpose Hall-ah upate leh ruihhlo ngaite tan a thlawna inentirna, Mental Health Clinic & Camp an buatsaih a; Social Welfare minister Lalrinpuii'n a hmanpui.

Minister Lalrinpuii chuan, sorkar chu India Danpuia Directive Principles of State Policy-in a phût angin mipui tana ding tur a nih thu a sawi a, "Mawhphurhna hrang hrang tihlawhtling turin theihtawp kan chhuah zel dawn a, mipui mamawh hrang hrang - kum upate hamṭhatna, ruang phurh senso phuhrûkna, a thlawna mipui inenkawlna leh ruihhlo do nana demand reduction lamahte hmalak mek a ni," a ti.

Ruihhlo vanga harsatna tâwkte chu ram hmelma an nih loh thu sawiin Lalrinpuii chuan, "Ruihhlo vanga harsatna tawkte chhan chhuak turin sorkar, kohhran, tlawmngai pawl leh home/centre dintute kan ṭanrual a ṭul. Ruihhloin a tihbuai chhungte pawh beidawng mai lo se, sorkarin ruahmanna a siamte sâwt zawka kalpui a nih theih nan sorkar thâ tichaktu nih tum zawk turin ka sáwm a ni," a ti a; home/centre-te tihchangtlun leh detoxification leh day care facility lamah ṭan an lak mek thu a sawi.

Social Welfare director Dr Lalhriatzuali Ralte pawhin thu sawiin, Mizorama cheng zinga 10% chu kum 60 chung lam an nih thu leh kum 100 dam thleng mi eng emaw zat an awm thu a sawi a, "Kum upate enkawl nan Atal Vayo Abhyuday Yojana hnuaiah mobile medical care unit leh physiotherapy unit pek a ni a, Ainawn Vengah mi 10 awm theihna Old Age Home din a ni," a ti.

National AYUSH Mission director S Mara Thansiami, SWD deputy director Gracy Lalchhanzuali, MSDRB coordinator Lalfakawmi, psychiatrist Dr R Lalmuanpuia leh National Programme for Health Care of the Elderly state programme coordinator Dr Martin Chawngsailova te pawhin thu sawiin, thil pawimawhte an zirtir a ni.

Mental Health Clinic & Camp-ah hian SWD leh AYUSH hotu te, Mizoram Upa Pawl aiawh te, Modern High School leh Apollo Nursing School zirlaite an tel a; AYUSH doctor-te'n damlote a thlawna an en bakah a tlawnin damdawi an sem. Clinic hi vawiinah chhunzawma zawh a ni ang.