National Highway kawng thawm ṭhat dan sawiho

Kolasib bawrhsap Robert C Lalhmangaiha kaihhruaiin nimin khan DC conference hall-ah sorkar hotu te, khawtlang leh tlawmngai pawl hruaitute an ṭhukhawm a; May 24, 2025-a Home Minister hoa Sairang leh Kawnpui inkar kawng an enfiahna leh sawihona aṭanga chak zawka National Highway 306 & 06 thawm ṭhat hna thawh dan tur an sawiho.

Robert C Lalhmangaiha chuan, kuminah fûr a inṭan hma avangin NHIDCL-in kawng thawm ṭhat hna an thawh nasa taka a nghawng thu a sawi a, "Kawngpui an siam tawh sa pawh hmun tam takah a chhe leh tawh. Hengte avang hian kawngpui ṭha kan neih theih nan theihtawpa kan ṭanho a ngai. Kar kal taah Home Minister-in kawng a enfiah tawh a, chuta kan thutluknate chu a rang thei anga bawhzui chu an tihmakmawh a ni," a ti.

NHIDCL aiawhte chuan an hnathawh dan leh harsatna an tawhte an tarlang a; sum sanction awm lo chu an harsatna ber a nih thu leh, sum pek chhuah hmain contractor ṭhenkhat chu mipui mamawhna avangin inbiakna an neihpui hnuah hna an ṭantir thute an sawi.

Tunlaia khawchhiain kawng siam a tihhautak thu te, ni hnih thum ruahsur loa a awm chuan kawng siamah nasa taka hma an sawn dawn thu te, Khamrang-Kawnpui inkar PWD enkawl mek pawh an kuta hlan ṭêp a nih thu leh, an kuta a awm rualin hna an thawh ṭan nghal dawn thute NHIDCL hotute chuan an sawi bawk.

Balaji Constructions hotute chuan, kawng thawm ṭhat ngai laite an thawm ṭha zel dawn tih an sawi a; kawng innghahna ram leilung a ngheh loh thu leh a innghahna tihngheh a nih loh chuan kawng a ṭha rei thei dawn lo tih an sawi rualin, estimate-ah kawng tihnghehna tur a tel loh thu an tarlang a ni.