Private school principal-te pual training

Mizoram State AIDS Control Society (MSACS), State Council for Education Reseach & Training (SCERT) leh UNICEF te chuan nimin khan SCERT conference hall, Aizawlah Aizawla private school principal-te pualin ni thum awh tur sikula hriselna lamhawi zirtirna an buatsaih ṭan.

Private School Principal on School Health Module Training-ah hian private school principal-te chu National Health Mission-in School Health Module hmanga zirtirna a buatsaihte hrilhfiah an ni a; principal-te chuan module hmangin an zirlaite chu hriselna leh himdamna chungchang an zirtirna ve leh chhawng dawn a ni.

Training hawnna inkhawmah SCERT director Caroline Zoramthangi chuan, zirtirtu pangngai ni lo, principal-te ngei training-naa an tel hian awmzia a nei bik thu a sawi. UNICEF health specialist Dr Ashish Dadwal pawhin private school principal 70 zet an tel thei chu lawmawm a tih thu a sawi bawk.

Training module-ah hian Adolescence Education Programme, life skill, value education, National Population Education Project leh taksa leh rilru sawizawina thil chi hrang hrang chungchanga naupangte ṭhan puitlinna leh an nun a famkimna tura zirtirnate a awm.