Mizoramah Inkhàrkhip laiin Boruak a thianghlim

Mizoram Pollution Control Board (MPCB)-in boruak bawlhhlawh dan an tehna hmun - Aizawl, Lunglei, Kolasib leh Champhai-ahte Mizorama inkhârkhip a nih chhungin boruak nasa takin a thianghlim phah a, boruak bawlhhlawh tehna Air Quality Index (AQI)-a a kawh san lam a tlahniam hle.

MPCB tarlan danin, India ram puma inkhàrkhip thawh khatna, March 25 - April 14 chhung khan Mizoram puma AQI tlakhniamna chu chawhrualin 15.55% aṭanga 55.15% a ni.

AQI hi boruak bawlh­hlawh dan azirin category hrang hrangah ṭhen a ni a, tuna Mizoram boruak din­hmun chu tehna hmun hrang hranga AQI-in a tarlan danin, category ṭha ber dinhmun 'Good' ah a awm mek. Boruak bawlhhlawh vanga mihringin hriselna lama harsatna a tawh ṭhin chu inkhàrkhip chhung hi chuan a thleng mang lo tura ngaih a nih thu MPCB chuan an tarlang.

Aizawl bikah, Dawrpui chhehvel boruak chu lockdown chhungin nasa takin a danglam a, inkhàrkhip hma chawlhkar hnih chhunga AQI chawhrual chu 48.5 a nih laiin, inkhàrkhip chhunga chawhrual chu 21.8 a ni thung. Boruak bawlhhlawh dan tehna an dahna zingah Lunglei Farm Vengah AQI a hniam ber a, 5 chauh a ni.

AQI san lama hriselna a nghawng theih dan (associated health impact)-te chu, 0-50 inkarah harsatna thlen meuh lo a, 51-100 inkarah mi áwm ném deuh tan thâwk harsatna a thlen thei. AQI 101-200 inkarah chuap leh lung natna nei / ṭha lo te, naupang leh upa lam tan thâwk  a tiharsa thei a, 201-300 inkarah rei tak hîp luhin thawk a tiharsa a, 301-400 inkarah thâwkna kaihhnawih natna a thlen thei a, 401 chung lamah chuan mi hrisel pangngai pawhin an tuar tawh ṭhin.

MPCB-in boruak din­hmun endikna hmun an neihte chu manual station a ni hlawm a, result hi teh ní aṭanga ni hnih chhung vela hriat theih a ni chauh ṭhin. Tun hnai khan result chawp leh chilha hriat theihna, automatic station chu sorkar laipui leh state sorkar puihnain an bun a, mipuiin eng hunah pawh air quality an hriat zel theih nan Sikulpuikawnah display board dah a ni.

Sikulpuikawna display board-ah hian eng lai pawhin boruak dinhmun târ chhuah a ni a; meteorological data hrang hrang - boruak lum leh vawh lam, boruak hnâwn dan (humidity), thli chak zawng leh a thâwtna lam, ruahtui tla zat leh solar radiation-te tarlan reng a ni bawk.

Tehna hmunAQI

Sikulpuikawn45

Dawrpui22

Laipuitlang21

Bawngkawn37

Kolasib Diakkawn19

Kolasib Project Veng14

Lunglei Venglai7

Lunglei Farm Veng5

Champhai Vengthlang23

Champhai Kahrawt15