Minister-in zirlai chawimawina a hmanpui

St. Paul's Higher Secondary School chuan nimin khan an sikul auditorium-ah kumin HSLC leh HSSLC-a an zirlai ti ṭhate chawimawina, Paulians' Proficiency Award hlanna hun an hmang a; khuallian Education minister Dr Vanlalthlana chuan, harsatna leh buaina bakah, inelna sang zawk hmachhawn thei tura inbuatsaih turin zirlaite a chah.

Dr Vanlalthlana chuan, zirlai hlawhtlingte chu lawmpui thu sawiin, hlawhtlinna tluantling nei turin mahni inthunun theihna, rinawmna leh taimaknate nunpui tlat a pawimawh thu a sawi a, "Zirlai in nih chhung hian thiamna rintlak leh ṭangkai, ram leh hnam tana chhenfakawm neih tumin bei u la, sikul in pelh huna harsatna leh buaina hmachhawn thiam tur leh inelna sang zawk in hmachhawn hunah pawh in hlawhtlin theih nan inbuatsaih rawh u," a ti.

Zirlaibu páwn lama thiam thilte zir tel ṭhin a pawimawh thu sawiin Minister chuan, "Mi zinga khawsak thiam te, harsatna kara ruahmanna siam thiamte leh a hun leh hmun azira inher rem thiamte a pawimawh," a ti a; tunlai mila thiamna hrang hrang chhuakte bêl chianga hmang ṭangkai hmasatu nih tum turin zirlaite a chah.

St. Paul's HSS zirlai hlawhtlingte hi School Education Minister leh Director bakah, Paulians' Alumni Association aiawhte'n lawmman an hlan a ni.