UPHC 10-ah thawktu 157 an awm

National Urban Health Mission (NUHM) chuan nimin khan White Stone Conference Hall, Aizawlah NUHM Module chungchang thlir letna leh zirhona an buatsaih a; Mizoramah urban primary health centre (UPHC) 10 awmin, thawktu mi 157 an awm mek tih an tarlang.

Ṭhutkhawm hi NUHM state nodal officer Dr Lalawmpuia Chhangte-in NUHM a kaihruai a; NUHM chu Mizoramah kum 2014 aṭangin kalpui a nih thu sawiin, "NUHM hian urban area (khawpui)-ah miretheite hnen thleng phak a thlawna inentirna leh inenkawl hi a tum ber a ni," a ti a; thawktute chu mipui tan an thiamna leh theihna hlan a, taima leh rinawm taka thawk zel turin a chah.

NUHM State Nodal Officer tarlan danin, NUHM hnuaiah hian Mizoramah UPHC a awm mek a; chungte chu - ITI Veng, Zemabawk, Sihphir, Chawlhhmun, Hlimen, Lawipu, Sazaikawn (Lunglei), Hrangchalkawn (Lunglei), Champhai leh Kolasib-ahte a ni.

UPHC tinah medical officer, pharmacist, staff nurse, health worker, laboratory technician, account clerk leh helper te an awm a; an vaiin mi 157 an ni. Specialist doctor-in kar tin thlawhin, inentirna hun buatsaih a ni ṭhin.

UPHC zawng zawngah doctor hnena inentirna chu a thlawn vek a ni a, damdawi leh test an tih theih ang angah pawh a theih chin chinah a thlawna tih a ni ṭhin. Nau neih leh natna ziaawm deuhte chu UPHC-ah admit theih an ni a; Inrinni tin (Inrinni vawi hnihna tel loin) hri danna damdawi (vaccine) lak theih a ni bawk.

NUHM Review Meeting-ah hian UPHC tina medical officer-te'n an damdawi-in dinhmun an sawifiah a ni.