Leilet dinhmun zirchianna inhlan

Mizoram Remote Sensing Application Centre (MIRSAC)-in geospatial technology hmanga Mizorama leilet hman mek leh la hman theih tur (potential area) ri chhinchhiahna (map & report) lehkhabu an buatsaih chu nimin khan MIRSAC member secretary H Lalsawmliana'n Agriculture & Farmers Welfare minister PC Vanlalruata hnenah a hlân.

Minister PC Vanlalruata chuan, MIRSAC-in thiamna hmanga Mizorama leilette ṭangkai zawka hman a nih theihna tura zirchianna leh chhinchhiahna lehkhabu an buatsaih chu a ṭangkai tur thu a sawi a, "He report bu leh a chhunga mâpte hi sorkarin ei leh bar intodelhna tura a hmalak meknaah hian buh leh bâl tam zawk thar chhuah kawngah a ṭangkai dawn hle a ni," a ti.

Lehkhabu inhlanna hun hi MIRSAC vice chairman Lalmalsawma Pachuau-in a kaihruai a; MIRSAC zirchiannaa a lan danin, Mizoramah leilet (wet rice cultivation) hectare 7,532.86-a zau a awm thu a sawi.