Naupang enkawl chungchang sawiho
National Commission for Protection of Child Rights (NCPCR) leh Mizoram State Commission for Protection of Child Rights (MSCPCR)-te chuan nimin khan Aijal Club-ah 'State level review meeting cum consultation on available facilities and status of new born and paediatric care in Mizoram - Analysing the gaps and steps to improve quality of care' an buatsaih a, Health minister Dr R Lalthangliana'n a hmanpui.
Health Minister chuan, nu leh naute hriselna enkawla venpuitute hnathawh a pawimawh thu sawiin, "Nausen kum khat an tlin hmaa thi zat (Infant Mortality Rate) chu nau piang 1,000 zelah 27 aṭangin 15-ah a tla thla tawh a, national average 34 aiin a hniam hle tawh. Hei aia tlahniam leh tur hian nuin nau a pài aṭangin uluk taka enkawl a, theihtawp chhuah leh a pawimawh a ni," a ti.
Dr Lalthangliana chuan, "Raicheha thi zat pawh kum hmasaah 29 an awm laiin, kumin kum kal mekah pariat an awm a, raicheha thi an awm loh nan ṭan nasat leh zuala ngai," a ti. Thingtlangah hriselna lamah hmasawn nasa zawk a awm theih nan nasa taka ṭan lak a nih thu sawiin, "Health sub-centre enkawltu tur pawh uluk taka training pek zel an ni a, B.Sc (Nursing) zir zo tawh ngeiin an enkawl zel tawh dawn a ni," a ti. Health Minister chuan, district hospital zawng zawngah paediatrician (naupang daktawr) leh gynaecologist (hmeichhe daktawr) dah a nih tawh thu te, primary health centre (PHC) zawng zawngah doctor dah kim a nih thu te, Aizawl Civil Hospital naupang ward-ah naupang pual Intensive Care Unit (ICU) dah tum a nih thu leh, ICU pawh kumin chhung ngeiin khum 10 tal leng tura siam a nih tur thu a sawi bawk. Inkhawmah hian Dr Lily Chhakchhuak, Dr TC Hmingthangi, Dr Lalchhuankimi leh Zonunpari Sailo ten naupang enkawlna kawnga thil pawimawh hrang hrang an sawi a ni.