KHAWTHLIR

Covid-19 Task Group on Animal Husbandary & Veterinary Science and Fisheries chuan tun hnai khan sangha man an bituk a, rate bituk aia sanga hralhte chu The Disaster Management Act, 2005 hmanga hrem theih an nih thu an tarlang. Sangha man an bituk dan chu - fingerling size (nghate) farm rate Rs. 130 leh wholesale rate Rs. 150 a ni a; sangha pakhat kg. khat aia tê farm rate Rs. 180 leh wholesale rate Rs. 250, kg. khat aia lian farm rate Rs. 200 leh wholesale rate Rs. 280 a ni.

Nimin zing khan Covid-19 dona atana damdawi hmanraw eng emaw zat chu Indian Air Force Dornier HM 693 hmangin Lengpui Airport-ah phurh thlen a ni a, State Referral Hospital lamah lak nghal a ni. Hmanruate hi ICMR-NIMR aṭanga dawn a ni.

April 18, Inrinni tlaia thlipui tleh leh ruahsurin Dampui khuaa chenna in eng emaw zat a tih­chhiat chu nimin khan khawtlangin hnatlangin an thawm ṭha a, bialtu MLA H Lalzirliana'n hnatlangte ei leh in tur leina atan Rs. 5,000 a pe. Dampui khuaah thlipui leh ruahin in 16 a tichhia a, in chhe zual paruk leh chhe nêp 10 vel a ni. YMA Sub-Headquarters, Mamit hruaitute chuan Dampui hnatlang an pui a, Rs. 2,000-in an ṭanpui bawk.

UPC NEI General Conference, April thlaa neih ṭhin chu Covid-19 boruak avangin General Administrative Committee chuan July 23-26, 2020 chhunga neih turin an sawn. UPC district/bial/local program lo duan lâwk tawh a awm a nih chuan lo insiam rem turin kohhran mipuite an ngen a ni.

Seventh Day Adventists (SDA) Mizo Conference office chu April 18, Inrinni zân zanlai vel khan rawk a ni a, Vaivakawn police-te'n nimin khan chhui nghalin, nimin zing khan a rawktute an man nghal. SDA pisa rawktute hian cheng nuai hnih vel an ru chhuak a, an kut aṭangin pawisa an ruk zinga 98% vel hmuh let nghal a ni. SDA chuan an pisa rawktute rang taka chhui chhuaktu Vaivakawn police-te chungah an lawm hle tih an tarlang.