Telangana sorkarin Mizo tangkhangte a pui

Telangana sorkar chuan Hyderabad Mizo Association (HMA) ngenna angin April 17, 2020 aṭang khan Hyderabad khawpuia Mizo tangkhangte hnenah pawisa leh ei leh in turte a sem ṭan a, a la sem mek zel. A hmain, April thla tir lam khan a lo sem tawh bawk.

HMA chuan, Hyderabad khawpuia hna thawka awm Mizote'n pawisa leh ei tur an tlakchham thu HMA-ah an thlen hlawm tih sawiin, "Mizo hnathawk ṭhenkhatte hian anmahni mai bakah Mizorama an chhungte an châwm avangin mahnia pawisa khâwl an nei mumal thei ṭhin lo. February leh March thla hlawh la mumal lo an tam hle bawk," an ti.

HMA tarlan danin, Mizo tangkhangte chhawmdâwl nan HMA chuan Hyde­rabad-a mi inphalte aṭangin Corona Fund an khawn a, chumi hmang chuan puih ngaite an 

ṭanpui a ni. Ṭanpuina mamawh zual list an neih chu April 6 khan HMA chuan Telangana sorkarah an thehlut a, a tûk April 7-ah sorkarin ṭanpuina a pe nghal a ni. 

Inkhârkhip chu May 3, 2020 thleng pawhsei a nih leh tâk avangin HMA chuan Hyderabad khawpuia Mizo hnathawk tangkhangte a bika ṭanpuina pek a nih theih nan Telangana sorkar ngen an rél. Hyderabad-a Mizo harsatna tâwk HMA member leh member ni lote pawh huam vekin list an la khawm a; hming, Aadhaar number, address, contact number, etc. te nen an la vek a, in report leh an lak khawmte chu in (household) 179-a mi 433 an ni.

HMA hruaitute chuan an list thar chu April 16 khan Telangana sorkarah a thehlut a, Telangana sorkar pawhin Ranga Reddy district leh Hyderabad district-a bawrhsap (DC)-te hnenah thawn chhâwng nghalin, DC-te chuan an bawhzui nghal a ni. List thehluh tuk, April 17 aṭangin DC office-a official-te chuan Mizote chu an awmnaah kal chilhin ei leh in turte an sem ta a ni.

Ration an sem tlangpui chu - buhfai kg. 12 (member azirin), tél, aieng, sahbawn, chî, atta, dailuah, chilli powder, etc. te a ni a, mi pakhat tan Rs. 500 ṭheuh an pe bawk.

HMA chuan, Telangana sorkar­in Mizote hnenah ration an la sem chhunzawm zel tih sawiin, "A mamawhte'n an dawn kim vek thleng an sem beisei a ni," an ti. Telangana sorkarin a hnuaia thawkte chu Covid-19 avangin March thla hlawh pe kim loin, a zatve (50%) chauh a pe rih tih sawiin, "Chutiang a nih laia an rama mikhual hna­thawk tangkhang mangang, engtikah mah tuna sorkar ding lai vote thei lo turte heti taka a ṭanpui hi an entawn tlak hle a ni," an ti.