Speaker-in Sesawnga In chhiate a enfiah
Legislative Assembly speaker Lalrinliana Sailo chuan nimin khan a bial, Chalfilh constituency chhunga Sesawng khuaa Inrinni chawhnua thlipui leh ruahpui vanga chhiat tâwkte a hmunah a tlawh a; inkhàrkhip vanga chhuancham leh mi harsa puih nan Sesawng tan buhfai ip 50, Khawruhlian atan ip 30 leh Khawlêk atan ip 20 a pe.
Sesawnga VC House-a khawtlang hruaitute nena an inkawmnaah Lalrinliana Sailo chuan, a bial harsatna chu a harsatna a nih thu sawiin, "Coronavirus vanga inkhàrkhipna kalpui mek laia mipui harsatna belhchhahtu khuarel chhiatna in tâwk hi a pawi ka ti hle," a ti a; Covid-19 do nan mahni intodelh a pawimawh thu sawiin, "Chhungkaw tinin buh leh bâl thar chhuah lama ṭan kan lâk thar a ngai a, kan idol-te chu loneitute leh kuthnathawktute hi an ni tur a ni," a ti.
Bialtu MLA chuan Inrinni chawhnua thlipui leh ruahpui vanga Sesawnga chenna in 20, luah zui tlak loha chhiate hnenah Rs. 5,000 leh buhfai ip khat ṭheuh a pe a; thawm ṭhata luah mai theih chungkaw 63 hnenah Rs. 3,000 ṭheuh a pe. VCP hnenah in thawm ṭhat ngaite mamawh lei nan Rs. 1,00,000 a hlân a; Sesawnga tui harsa tihziaawm nan a mimal motor chu mipui tui mamawh phurh nan Sesawngah a dah nghal bawk.