Serchhip YMA-in ṭanpuina an sem

YMA Sub-Hqrs. Serchhip ten Covid-19 vanga ramri hnaia duty-te ṭanpuina atana báwm an hùnah Rs. 2,38,671 an hmu a, pawisate chu nimin khan an sem chhuak.

Covid-19 laka Mizoram a him theihna tura Mizoram ramri vèn hna tlawmngaia thawktute ṭanpuina atan hian Serchhip Sub-Hqrs. YMA chuan Serchhip khawpuia YMA branch hrang hrang 21-a task force-te duty-na hmunah báwm an húng a, Rs. 2,38,671 a tla a ni. Khawpui pawn - Bungtlang Bazar, Zote South, Vanchéngte, Sialhau, Keiṭum leh Théntlang branch-te aṭangin Rs. 26,895 an dawng bawk.

Serchhip Sub-Hqrs. YMA hian an sum hmuhte chu Kolasib Sub-Hqrs. YMA kutah Rs. 1,00,000 leh Mamit Sub-Hqrs. YMA kutah Rs. 1,08,671 an hlan a; Serchhip district chhunga ramria duty-na neite'n an hman turin Tuichangral South Group YMA hnenah Rs. 30,000 an hlân bawk. Tuichangral South Group YMA hnuaia branch zingah Sailulak leh Lungkawlh branch-te chu ramri-ah an duty ṭhin a ni.