Covid-19 kai rinhlelhte chhuahtir

Covid-19 kai rinhlelh thila tun hnaia State Referral Hospital-a damlo dah luhte zinga nimin thlenga awm mi pali zinga pathum chu Covid-19 an kai lo tih finfiah a nih tawh avangin nimin khan chhuahtir an ni a; pakhat erawh chu vawiinah swab sample endik a ni ang. Nimin khan Covid-19 kai rinhlelh vanga admit thar an awm lo a, swab sample test a awm lo bawk.

SRH-ZMC Covid-19 Bulletin chuan, Covid-19 vei State Referral Hospital ICU-a enkawl mek chu a din­hmun a ṭha ve sâwt viau a, ngaihtuahawm a ni lo tih tarlangin, ṭawngṭaipui zel turin mipui an ngen. Vawiin hian Ministry of Health & Family Welfare aiawhte'n State Referral Hospital chu dedicated Covid-19 hospital a nih angin an endik dawn tih an tarlang bawk.