Thlipui leh ruahpui thawk thei lakah sorkarin fimkhur turin mipui a chah

India Meteorological Department (IMD), Guwahati chuan, May 28 - June 3, 2025 chhungin Mizoram leh hmarchhak state dangah thlipui leh ruahpui thawk thei a nih thu tarlangin, fimkhur tura thurawn a tichhuak. Hei vang hian Mizoram sorkara Disaster Management & Rehabilitation (DMR) department chuan fimkhur lehzual turin chhung tin an ngen.

IMD chuan Mizoram, Nagaland, Manipur leh Tripura state-ahte vawiin May 29 hi 'Red alert' ah dahin, nasa taka ruah, thlipui leh ṭêkte thawk tur (extremely) angin a dah. Naktuk Zirtawpni aṭanga June 1, 2025 thlengin nasa taka thil leh ṭêk nena thawk tur anga dah a nih bakah, June 2-3, 2025 chu ruahsur nasa tur angin a dah bawk.

IMD thurawn avang hian DMR secretary K Lalrinzuali chuan hriattirna tichhuakin, "Mizoram hmun ṭhenkhat ruah nasa tak sûr thei dinhmunah a ding mek a, thli leh ṭêk pawh a awm theih thu khawchin thlir lawktute chuan an sawi. A bikin 29.05.2025 hian ruah nasa taka sûr tura thlir lâwk a ni. Chhiatna laka kan him theih nan chhung tinte a theih ang anga fimkhur lehzual turin kan inngen nawn leh a ni," a ti.

DMR Secretary chuan, chhiatna thleng palhah District Operation Centre toll free number 1077, State Emergency Operation Centre toll free number 1070 leh Emergency Response Support System toll free number 112-ahte hriattir turin a chah.

Aizawl District Disaster Management Authority chairman leh bawrhsap Lalhriatpuia pawhin hriattirna a tichhuak ve nghal. Bawrhsap hian May 29-30 chhunga ruah leh thlipui thawk thei vangin fimkhur turin mipui a ngen a; chhiatna thleng a awm chuan toll free no. 1077, 1070 (emaw 0389-2342520) leh 112-ahte hriattir vat turin mi tin a ngen a ni.

Aizawl Bawrhsap chuan, IMD-in khawchin a thlirnaah vawiin leh naktuk (May 28 & 29) hian Mizoram hmun ṭhenkhatah ruah leh thli darkar khata km. 40-50 vela chaka thawh theihna a awm tih a tarlang a, "Aizawl district-a local/village disaster committee-te mahni veng/khua ṭheuhah a ṭul anga hma la tur leh inkaihhruaina tarlante puangzar turin kan inngenin kan inhriattir e," a ti.

Thlipui leh ruah a thawh laiin electric hmang chi khawlte titawp (off) vek tur te, lirtheite garage-ah him taka dah tur te, mahni in leh lo chhuahsan lo tur te, tuihâwk luankawr bul, lui leh lui bul hnaiahte kal lo turtein mi tin a chah a; khuarel chhiatna a thlenin bialtu zonal officer-te hnenah hriattir turin a chah bawk.

DISTRICT MAGISTRATE TARLAN ṬHENKHAT

☑ Mahni in leh lo, office building leh hnathawhna hmunte a ṭul anga thawm ṭhat tur.

☑ Thing leh mau, thliin a len thluk mai theihte leh electric wire delh chhe theih turte kih emaw, a zar thlak tur.

☑ Tuihâwk luankawrte tihfai tur.

☑ Lei laih lai neite tan lei a min loh nan uluk taka khuh hul tur.

☑ Mahni ram chhung leimin hlauhawma awmte ram neitute'n khuh hul tur.

☑ In chung rangva, thliin a lak mai theihte thawm ṭhat tur.