CM leh Union minister-te an inkâwm

Chief minister Lalduhoma chuan May 27, Thawhlehni khan Union Housing and Urban Affairs & Power minister Manohar Lal chu a chenna inah a hmu a, Jal Shakti minister CR Patil pawh a chenna inah a kâwm bawk. CM hian Union minister-te hi Mizoram tana thil pawimawh hrang hrang a sawipui a ni.

Lalduhoma hian Ministry of Housing & Urban Affairs-in Thenzawla Peace City dinna tura detailed project report siamna tur cheng vbc 10 a pek avangin a lawm thu Manohar Lal a hrilh a; GBS (Gross Budgetary Support) 10% leh Revamped Distribution Sector Scheme (RDSS) hnuaia Mizoram sorkarin project proposal a thehluhte leh kawlphethaa Mizoram hmasawnna tur hrang hrangte an sawi dûn bawk.

Nimin veka Chief Minister leh Union Jal Shakti minister CR Patil inkâwm chuan Mat luia Integrated Water Resources Management Project chungchang an sawi dun a; Project hi cheng vbc 177 hû tura duan niin, thlai câawmtu tur tui lakna leh mipui tui tlan tur lakna atana ruahman a ni. He project hi Brahmaputra Board nena hmalak tura tih niin, chak taka bawhzui ni se, an ti.

CM Lalduhoma hi nimin khan Ministry of Power hnuaia Satluj Jal Vidyut Nigam (SJVN) hotute'n New Delhi Mizoram House-ah an kâwm bawk a; kawlphetha megawatt 2,400 pe chhuak thei tur Darzo bul Chimtuipui luia Pumped Storage Project an ruahmante an hrilhfiah a, hmalak zel dan tur an sawiho a ni. SJVN hotute hian May 27, Thawhlehnia CM Lalduhoma leh leh Union Power Minister inkawmna bawhzuiin Chief Minister hi an hmu a ni.