Meichher Award 2024 sem a ni

School Education department chuan nimin khan an directorate conference hall-ah Meichher Award 2024 an sem a, School Education minister Dr Vanlalthlana'n a hmanpui. Rev. Dr Lalchawimawia, Zemabawk-in kum 2024 chhunga Meichher chanchinbua thuziak ṭha ber lawmman a dawng.

Meichher Award 2024 dawngtute chu - Best Article-ah pakhatna Rev. Dr Lalchawimawia, Zemabawk a ni a; pahnihna Prof. Chawngsailova, Chawlhhmun leh pathumna Rev. VL Luaia Hranleh, Mission Veng an ni. Best Contributor (thuziak thawh ṭha) chu B Lalthangliana, Chhinga Veng a ni a, Familia Fanai Laltansanga Lunglei Zotlang chu pahnihna niin, Mahmuaka Chhakchhuak, Lunglei Chanmari chu pathumna a ni.

Minister Dr Vanlalthlana chuan, thu ziah chu thil awlái lo tak a nih avangin thuziak mite chu amah cho thartu an nih ṭhin thu a sawi a, "Meichher chanchinbu hlutna chu tun hma aṭangin Mizoram history pawimawh leh thu leh hla ṭha tak tak chhuahna a ni a, Mizote tan thil hlu dahna ang a ni," a ti.

School Education department hnuaia Adult Education Wing chungchang sawiin Dr Vanlalthlana chuan, "Puitling tawhte ziak leh chhiar zirtir hi thil awlai lo tak a ni. Adult Education Wing-in kum upa tawhte'n ziak leh chhiar an thiam theih nana an hmalaknaah fak an phu a, ULLAS hnuaia full literacy state kan puan theihna pawh Adult Education Wing hnathawh rah a ni," a ti a; ziak leh chhiar zirtirtu volunteer teacher-te thawhrimna chhuanawm a tih thu a sawi.

Meichher Award 2024 semna inkhawm hi School Education director Angela Zothanpuii'n a kaihruai a; School Education department leh a kaihhnawih department hotu te, award dawngtute leh an chhung te, Mizo Academy of Letters leh Mizo Writter Association hruaitute an tel.

Meichher editor TC Lalremsiama tarlan danin, Adult Education Wing tihchhuah 'Meichher' hi thlakip chhuak a ni a, a tirah chuan 'Zoram Eng' tih niin, March & April 1975 chhuak chu a bul ṭanna a ni. October 1975 aṭangin 'Meichher' tih a ni a; May 2025 chhuak chu bu 807-na a ni.