LESDE Minister leh IIE hotu inkâwm

Labour, Employment, Skill Development & Entrepre-neurship (LESDE) minister Lalnghinglova Hmar chu nimin khan Indian Institute of Entrepre-neurship (IIE), Guwahati director Ishwar Chanabasappa Poojar nen an inkâwm. IIE hotute chuan, Mizoramah tourism hmasawnna turin kutkawih eizawnna keng tel project siam an duh thu an hrilh.

IIE director Ishwar Chana-basappa Poojar chuan, Mizorama tourism hmasawnna turin kutkawih eizawnna (entrepre-neurship) keng tel project siam an duh a, chumi chungchang sawiho turin Mizorama sorkar department hrang hrangte nen ṭhutkhawm an duh thu a sawi a ni. Minister Lalnghinglova Hmar chuan tihhlawhtlin a nih tur thu a hrilh.

Mizoramah a bul ṭanna atan sikul thlan chhuah ṭhenkhatah ruahtui khawl (rain water harvesting) dan inzirtirna neih an duh tih IIE Director chuan a sawi a, "Hmanruate leh hnathawktute thlangin, IIE kaltlangin ruahtui khawl leh a vawnhimna kan ngaihtuahsak thei," a ti a; naupangte chu tui renchem leh tui thianghlim khawl kawnga kaihhruaina pek leh kutkawih eizawnna lam zirtir nghal a nih tur thu a sawi.

Lalnghinglova Hmar chuan, IIE chu Mizoramin a la chhawr ṭangkai tâwk lo tih sawiin, "IIE kaltlanga kutthiamna leh leh kutkawih eizawnna lama hma thar lak kan duh a, Mizoram nen inthlun zawmna ṭha kan mamawh. Ministry of Skill Deve-lopment and Entrepreneurship hnuaia awm in nih angin Mizoram LESDE department nen ṭan kawp a ṭul," a ti a; IIE hnuaia scheme kalpuite chu Mizorama an tih dawnah LESDE hriattir ṭhin turin a chah.

LESDE Minister hi Guwahati Mizoram House deputy resident commissioner Dr Saithangpuia'n a ṭawiawm a ni.