KHAWTHLIR

Zirlaite'n thisen pe

Boston Higher Secondary School chuan an din champha lawm nan nimin khan Mission Venga an hmunah Blood Donation Camp an buatsaih a, Civil Hospital, Aizawl tan thisen unit 52 an pe a, petute mipa 38 leh hmeichhia 13 an ni.

Police-in meth man

Mizoram Police-a CID (Special Branch) team chuan May 27, Thawhlehni khan Tuirial leh Zemabawk inkarah operation an nei a, chawhnu dar 2-ah Zemabawk North-ah Bolero MZ-01 Z-9687 aṭangin methamphetamine kg. 19.693 an man a, cheng vbc. 2.56 hûa chhût a ni. Lirthei khalhtu Laltleipuia (34) s/o Sehauva (L), Ramthar North, tuna Pangbalkawn, Kolasib district-a cheng mek nia inchhál an man nghal bawk.

Sangha ṭanpuina

Mamit district fisheries development officer Lalramzawnchhuaha Khawlhring chuan nimin khan Mamit district-a Pradhan Mantri Matsya Sampada Yojana hnuaia tuikhuah ṭanpuina diltu mi 40 hnenah ṭanpuina, 'Construction of New Rearing Pond' a sem. He hunah hian district programme manager Rosalind Vansangkimi leh demonstrator Jimmy Lalbiaktluanga ten ṭanpuina dawngtute chu thil pawimawhte an zirtir a ni.

Lei laih khap

Aizawl Municipal Corporation commissioner Joseph H Lalramsanga chuan hriattirna tichhuakin, kuminah May 28 aṭanga June 2 thleng AMC huam chhungah lei laih khap a nih thu a puang. Khapna thupek hi ruah leh thlipui thleng thei vanga leimin leh chhiatna dangte pumpelh a nih theihna tura tihchhuah a nih thu tarlan a ni.

Zirlai chawimawi

Oikos Higher Secondary School chuan HSSLC 2025-a an sikul aṭanga top 10-a langte leh subject topper-te chawimawina hun nimin khan Tuikhuahtlang Presbyterian Kohhran Hall-ah an buatsaih a, Baryl Vanneihsangi, MLA-in a hmanpui. Oikos HSS aṭang hian HSSLC 2025 Commerce-ah topper an neih bakah, Commerce leh Arts-ah top 10-a lang zirlai paruk an nei a ni.