Police-in an hnathawh an thlir lêt; Ramri hmun 135-ah police 700 vel duty
Mizoram police-a inspector general of police (Law and Order) LH Shanliana hoin nimin khan Aizawl SP conference hall-ah police officer-te'n Covid-19 donaa police hmalakna hrang hrangte thlirhona review meeting vawi 4-na an nei. IGP chuan, Mizorama khawchhak leh khawthlang lama ramri hrûl hmun 135-ah police 700 velin venhimna hna an thawk mek tih a sawi.
LH Shanliana chuan, "March 16 aṭang khan Mizoram police-te hi ni khat mah châwl loin vawiin thlengin kan duty a, lockdown awm chhung zawng chuan he an hna hi ngawrh takin kan thawk chhunzawm zel dawn a ni," a ti.
IGP chuan, tun dinhmunah khawchhak leh khawthlang ramri hrûl hmun 135-ah police 700 velin venhimna hna an thawk tih sawiin, "Task force-te hi hmun 198-ah mi 2,000 aia tlem lo ni tin an duty bawk a, police-te leh mi tlawmngai rual inpete nen thawhhona ṭha tak kan nei a ni," a ti a; ṭangrualna leh thawhhona ṭha avangin tun thlengin Mizoram a la him thu a sawi.
Meeting-a tarlan danin, DIG (Northern Range) kaihhruaina hnuaiah police officer 15 leh police dangte'n contact tracing (Covid-19 kai theia ngaih chhui zuina) an buaipui mek a, dan leh thupek kenkawhna bikah hmun 182-ah mi 1,776 an duty a ni.
Police station hna kal lai pangngai leh police duty dang hrang hrangte piah lamah, Covid-19 kaihhnawiah eng lai pawhin Mizoram hmun hrang hrangah police mi leh sa 2,500 aia tlem lote'n ni tin venhimna hna an thawk. Service training chhuak hlim mi 170-te pawh duty tura tirh chhuah nghal an ni a, khawthlang lam ramrî-ah mamawhna a sàn avangin an zinga mi 70-te chu tirh nghal an ni.
Covid-19 chungchang review meeting hi Pathianni apiangin neih ṭhin a ni a, he hunah hian DIG (Eastern Range) Lalhuliana Fanai leh DIG (Armed Branch) Laldingluaia ten tun hnaia khawchhak ramria police duty leh khawthlang ramria duty hmun hrang hrang an tlawh kualna report tâwi an pe. Covid-19 kaihhnawiha an duty-na hmuna tun hnaia thi - Hav. F Lalthansanga leh constable PC Vankhawpuimawia te sûnna hun an hmang bawk.