ICDS hnuaiah hamṭhatna dawng kum 6 hnuai mi 1,05,295 awm mek

Mizoramah Integrated Child Development Scheme (ICDS) hnuaiah hamṭhatna dawng naupang kum 6 hnuai lam 1,05,295, nau pâi leh hnute pe lai nu 10,414 an awm mek a; kum 2024-25 chhung khan Women Helpline-in phone call 10,637 an dawng.

Women & Child Development minister of state Savitri Thakur hoin May 28, Nilaini tlai khan Aijal Club-ah Mizorama Women & Child Development (WCD) department hnuaia hmalaknate thlir let a ni a; hmeichhe chunga hleilenna leh harsatna thlenna tur Women Helpline-in kum 2024-25 chhung khan phone call 10,637 an dawng a, One Stop Centre (OSC)-ah hmeichhia 1,203 enkawl an ni tih tarlan a ni.

ICDS hnuaiah Saksham Anganwadi Centre kaltlangin hamṭhatna dawng naupang kum 6 hnuai lam 1,05,295 an awm a, nu nau pai leh naute hnute pe lai 10,414 leh hmeichhe tleirawl kum 14-18 inkar 18,775 an awm mek thu tarlan a ni bawk.

Ṭhutkhawmah hian Union WCD minister Savitri Thakur chuan, Mizorama anganwadi centre thawmṭhatna tur leh thawktu lak belhna tura ruahmannate chak zawka buaipui turin WCD hotute a chah a; ṭanpui turin sorkar laipui a inhuam reng thu a sawi.

Savitri Thakur chuan, WCD department kaltlanga Mizorama naupang leh hmeichhiate venhimna, hriselna leh dinhmun chawi kâng tura hmalakna hrang hrangah a lawm thu a sawi a, "Hetihrual hian, anganwadi centre kawphetha nena la thlun zawm loh eng emaw zat awm te, anganwadi centre 400 chuang Saksham Anganwadi Centre-a hlan kai la ni ve lote leh Nari Adalat kalpui ṭan la ni lote hi chak zawkin thawktute'n in bawhzui a ṭul," a ti.

Ṭhutkhawm kaihruaitu Mizoram WCD minister Lalrinpuii chuan, WCD hmalakna hrang hrang chhinchhiah leh thehluhna kawngah khawl leh software vangin thawktute'n harsatna an tawh ṭhin thu a sawi a; chu'ng harsatnate chu a rang lama chinfel a nih theih nan hma laksak turin Union Minister a ngen.

Union WCD minister Savitri Thakur hoa ṭhutkhawmah hian WCD-a thawktute chuan WCD department kaltlanga hamṭhatna dawngtute leh hmalakna hrang hrangte sâwt lehzuala kalpui a nih theih nan sorkar laipui aṭangin a hun takah ṭanpuina (fund) an dawn a ṭul thu an sawi.

Siaha, Kolasib, Mamit, Aizawl, Serchhip, Lawngtlai-a observation home-te a hungna siam a ṭul thu leh harsatna bik nei naupang enkawlna tur hmun leh mithiam mamawh a nih thute an tarlang bawk.