Viksit Krishi Sankalp Abhiyan ṭan a ni

India ram pum huapa hmanrua leh thiamna changkang zawk hmanga loneitute puihna tura hmalakna, Viksit Krishi Sankalp Abhiyan (VKSA) campaign chu nimin khan College of Veterinary Sciences and Animal Husbandry, Selesihah hawn a ni a; Horticulture leh Animal Husbandry & Veterinary enkawltu minister C Lalsawivunga leh Agriculture & Farmers Welfare minister PC Vanlalruata ten an hmanpui.

VKSA (Pre-Kharif Campaign) hi India ram pum huapa hmanrua leh thiamna changkang zawk hmanga loneitute puihna tura hmalakna a ni a, June 12, 2025 thleng kalpui tur a ni. India rama distirict 700-a khaw 65,000 tuam tura ruahman niin, loneitu mi nuai 150 tlawh chhuah tum a ni.

Hawnna inkhawm kaihruaitu Agriculture secretary Ramdinliani chuan, VKSA kaltlangin Mizorama khaw 737-ah kut hnathawktu 1,15,200 hnenah thiamna bik nei team 24-in loneitu leh ran vulhtute chu thlai chìn leh venhim dan te, ran vulh chungchanga thil pawimawhte leh sorkar scheme-te an zirtir dawn tih a sawi.

Khuallian C Lalsawivunga chuan, kum 2047-ah chuan India chu ram hmasawn leh intodelha siam chu tum a nih thu sawiin, "VKSA hi he hmathlir tihlawhtling tur a hmalakna pawimawh tak a ni," a ti a; VKSA chuan ei leh bara intodelh leh hmasawnna kawngah rahbi thar a thlen ngei a beisei thu a sawi.

C Lalsawivunga chuan, Intodelh chu hmasawnna tehfung pawimawh a nih thu sawiin, "Ei leh bara intodelh tura thawktu pawimawh ber chu kut hnathawktute an ni a, an thiamna leh theihna tipung turin sorkar department hrang hranga mithiamte kaihruaina a ṭul a, ku thnathawktute ban phakah, an mamawhna zâwna kaihruaitu tur mithiamte an awm a ṭul," a ti.

Khualzahawm PC Vanlalruata pawhin thu sawiin, kut hnathawktute dinhmun chawikan a nih theih nan sorkar department hrang hranga mithiamte hman ṭangkai leh sorkar laipui scheme tihhlawhtlin a pawimawh thu a sawi.

VKSA campaign hi nimin vek khan Lunglei leh Hnahthial district tan nimin khan Hnahthial DC pisa kawtah Hnahthial additional DC Zothanmawia Khiangte-in a hawng a; Siaha district tan DRDO conference hall-ah additional DC Abraham Beirazi Khithie-a'n a hawng.

Lawngtlai district tan Multipurpose Community Centre, Chawnhuah Lawngtlai SDO(C) Margaret J Vanlalremmawii'n a hawng a; Khawzawl district tan Zaingen YMA Hall-ah bawrhsap K Vanlalṭhiana'n a hawng bawk.

Hnahthial leh Lunglei district hian Krishi Vigyan Kendra (KVK) an la inṭâwm a; hei vang hian campaign-ah hian district pakhat angin an kal rih dawn. Lunglei leh Hnahthial district khaw 99-a campaign tur Horticulture, Agriculture, AH&Vety, Sericulture leh Fisheries department-a mithiamte telna team pathum chu campaign turin nimin khan vailiam an ni.