MZP-in ramri hung dodal zel an tum

MZP chuan India (Mizoram) leh Myanmar ramri hung chu Zo fate inpumkhatna atana harsatna thlentu a nih dawn avangin dodal zel an tum thu an tarlang a; Zampui Phuldungsei Thaidawr tlang pannaah police dah turin Mizoram sorkar an ngen.

MZP Gen.Hqrs Executive Committee chu nimin khan an pisa conference hall-ah an ṭhu a; an president H Lalthianghlima'n a kaihruai. Mizoram leh Myanmar ramri hung tum chungchang an ngaihtuah a, "Indo Myanmar border hung tumna hian Zo fate inpumkhatna atan harsatna a thlen dawn avangin MZP-in dodal zel ni rawh se," an ti.

MZP chuan, Phuldungsei Thaidawr tlâng panna kawng sira Tripura sorkarin Forest Guest House an sak mek May 28, 2025 zing dar 2-3 inkara bomb hmanga beih a ni chu an dem thu an tarlang a, "Thil thlenna hmun hi Mizoram chhung a nih avangin Mizoram sorkar thuneitute'n a rang lama thil thlen dan chhui tur leh Thaidawr tlang pannaah Mizoram police duty dah ve nghal turin sorkar thuneitute kan ngen," an ti a; Tripura sorkarin Forest Guest House an sak mek chu titawp nghal turin Mizoram sorkar an ngen.

Mizoram chhungah Tripura sorkarin Forest Guest House an sa tih sawiin MZP chuan, "A bul lawkah Tripura State Rifle an duty reng laia beih a ni hian Mizoram state puh hmingchhiatna tura thiam taka ruahman a ni ang em tih kan ngaihtuah," an ti a; Phuldungsei mipui tithlabartu leh Mizoram mualphona thlen thei thil thlen dan chhui chhuak vat turin Mizoram sorkar an ngen a ni.

MZP hian zirtirtu aikal late lakah sorkarin action a lak theih nana hmalak te, sorkar aṭanga hlawh la sikul ṭhenkhatin fee sang taka an la ṭhin tihtawp a nih theih nana hmalak te, Mizoramin state university ṭha tak a neih theih nana hmalak an rel bawk.