MZU-ah ruihhlo zirhona ṭan a ni

Social Welfare minister Lalrinpuii chuan nimin khan Mizoram University auditorium-ah khawvel pum huapa ruihhlo hmansual chungchang zirhona ni hnih awh tur, ‘International Conference on Substance Use Disorder' (ICSUD 2025) a hawng.

Zirhona hi MZU School of Medical and Paramedical Sciences hnuaia Department of Clinical Psychology huaihawt a ni a; thupui chu 'Global Perspectives, Local Challenges and Integrated Solution’ tih a ni.

Minister Lalrinpuii chuan, tunlaia Mizoram hun tawn mek leh ruihhlo donaa sorkar hmalaknate sawiin, "Ruihhlo hi Mizo hnam hmasawnna dâltu lian tak a ni a, ruihhloin taksa leh rilru a tichhe nasa hle. Ruihlo donaah kan ṭan rual tlan a pawimawh tak zet a ni," a ti.

Zirhonaah hian India ram chhung leh páwn aṭangin mithiamte leh ruihhlo ngaite enkawlna lama thawktute'n thupui an sawi dawn a; MZU School of Medical and Paramedical Sciences mite bakah, Zoram Medical College & Hospital, Mizoram College of Nursing leh Regional Institute of Paramedical and Nursing Sciences (RIPANS)-a zirlai leh zirtirtute an tel.

Hawnna inkhawmah hian MZU vice chancellor Prof. Dibakar Chandra Deka, Social Welfare director Dr Lalhriatzuali Ralte leh conference concener Dr M Sandhyarani Devi te pawhin thu an sawi a ni.