KHAWTHLIR

Union Minister-in ZMCH a tlawh

Union Women & Child Development minister of state Savitri Thakur chuan nimin khan Zoram Medical College & Hospital a tlawh a, hmunhma hrang hrang a fan kual bakah, thawktute leh zirtirtute nen an inkâwm. ZMCH hotute chuan damlo enkawl leh hriselna chungchanga harsatna hrang hrangte Union Minister hnenah hian an lo thlen. Minister hian Aibawk RD Block hnuaia hmasawnna hnathawh ṭhenkhat a hmunah a en bawk. Savitri Thakur hian nimin vek khan Mizoram chhuahsanin Delhi a pan a ni.

Sikul châwl

India Meteorological Department, Guwahati-in tun hnaia Mizoram leh hmarchhak state dangahte thlipui leh ṭêk tla thei leh, nasa taka ruah sûr thei leh May 29-ah a nasa zual theia a hmuh avangin Mizoram sorkar chuan nimin May 29 kha sikul chawlhah a puang. Sikul chawlhna tur thupek chu School Education department-in May 28, Nilaini zan khan a tichhuak a ni.

Thei leh thlai sâwngbâwl zirho

Science Technology and Innovation Hub, Mizoram leh State Agricultural Management and Extension Training Institute (SAMETI) buatsaih, ‘Packaging and Processing of Fruits and Vegetables’ training chu nimin khan Mizoram University-ah khâr a ni. Training-ah hian mi 30 an tel a, food & nutrition leh ayurveda & health team ten ei siam dan hrang hrang bakah, sawhthing sawngbawl dante an zirtir a ni.

Common carp chungchang inzirtir

Champhai District Fisheries Develop-ment Officer leh NFDB - Northeast Regional Centre, Guwahati te chuan nimin khan Champhai district-a sangha khawitute tan ni thum awh tur common carp chungchang inzirtirna an buatsaih. 'Non-residential training program on BPM on breeding and seed production of common carp using Happa’ ah hian sangha khawitu mi 25 an tel a; F Laldingliana Fish Seed Farm, Tlangsamah field demonstration neih a ni.

Pastor Retreat buatsaih

Mizoram Synod chuan May 27 aṭang khan Aizawl Theological College-ah Pastor Retreat an buatsaih a, neih mek niin, vawiin hian khar a ni ang. Pastor Retreat-ah hian Mizoram Synod hnuaia thawk mek pastor/minister-te bakah pension tawhte an tel a; May 27 zan khan Synod moderator Rev. RC Lalnghakliana'n a hawng. Mi hrang hrangin pastor hna leh rawngbawlna chungchang thupui hrang hrang an sawi a; sawihona hun hman ṭhin a ni bawk.