Police kutthlak chungchangah sorkar phût

MZP Gen. Hqrs. chuan thuchhuah siamin, April 18, Inrinnia Covid-19 vanga New Kawnpuia duty 5th IR police duty pahnih C Lalhruaitluanga leh R Zairemmawia te Chakma ten kut an thlak chu thinurthlak an tih thu an tarlang a; Zo­muan­tlang khuaa police OC (Chakma) chu a rang thei ang bera sawn chhuak tur leh police tam zawk darkar 24 chhunga dah belh turin sorkar an phût.

MZP chuan, police pahnih duty lai kut thlaktute chu a rang thei ang bera man turin sorkar an phût tih sawiin, "IR duty kut thlaktute hi sorkarin a man lo a nih chuan Chakma misualte man turin Mizo ṭhalaite kan che chhuak nghal ang," an ti a; Tripura leh Mizoram inrìnaah Tripura lama Chakma-te duty tawh lo se an duh thu leh police pahnihte chu Mizoram sorkarin an inenkawlna tumsak se an duh thu an sawi.

MZP-te hian IR duty Chakma kut tuarte chu nimin khan Aizawl Civil Hospital-ah an lo hmuak a, kanna pawisa an pe. Nimin tlai khan MZP hruaitute leh adviser-te'n Home minister Lalchamliana chu a chenna inah an hmu a, sorkar hmalakna tura an rawtnate an thlen a ni.

Hachhek Constituency Development Committee (HCDC) pawhin nimin khan thuchhuah siamin, New Kawnpuia police duty lai Chakma ten kut an thlak chu hriatthiam har an tih tak zet thu an tarlang a, kut thlaktute hrem ngei turin sorkar an phût.

HCDC chuan, Mizoram chhungah ngei Mizote'n hnam dang kut an tuar fo chu pawi an tih thu sawiin, "Kan constituency chhunga kan sipai duty-te meuhin kut an tuar ta mai hi pawi kan tiin zahthlak kan ti hle a, kan rilru a na tak zet a, kan thin a rim hle bawk. Venhim ngai kan nihzia leh Hachhek constituency-in sipai kan mamawh belhzia tilang chiangtu a ni tih kan sorkar hian min hriatpui se la, hma la nghal turin sorkar kan ngen a ni," an ti