Bangladesh aṭanga Mizorama luh theihna a awmah ngai

YMA Sub-Headquarters, Lunglei hruaitute chuan tun hnai khan Bangladesh leh Mizoram inrìna vela local task force duty-te an tlawh kual a, Bangladesh aṭanga awlsam taka Mizoram luh theihna a awmah an ngai.

Lunglei Sub-Hqrs. YMA hruaitute chuan, Borapansury khaw bula Borapansury lui kânna lei hnuai chu awlsam taka Bangladesh lam nen inkal pawh theihnaah an ngai a; hei vang hian ramri kana Mizorama luh tumte venga duty turin Borapansury Young Chakma Association (YCA) an ngen. YCA member-te chuan April 18 khan inkal pawh theihna hi an ping a, riak lutin an veng nghal a ni.

Lunglei YMA hruaitute chuan, ramri venhim hna chu Border Security Force (BSF) sipaite kuta nghat mai lo a, Covid-19 laka Mizoram leh a chhunga chengte an him theih nan uluk taka duty turin YCA hruaitute an chah.

CADC huam chhung khuate theihtawp chhuaha ramri venga duty turin Khawthlangtuipui Group YMA-te chuan khawtlang hruaitute an lo hrilh tawh bawk.