Chapchar Kût souvenir tlangzarh a ni; CM-in Chapchar Kûtah lawmman siam ṭha a ti

Chief minister Lalduhoma, Chapchar Kût Organising Committee chairman ni bawk chuan nimin khan CM conference hall-ah Chapchar Kût 2025 souvenir 'Nghilhloh Bu' a tlangzarh. CM chuan, Chapchar Kut hmannaah lawmman siam ṭhin ṭha a tih thu a sawi.

CM Lalduhoma chuan, Chapchar Kûtah lawmman siam ṭha a tih thu sawiin, "Programme-a a ti ṭha bikte ni se, a zo zawngin ni thei se. Hei hian inelna thianghlim a siam ang a, mi promote zawngin tih ni se," a ti.

Souvenir buatsaihtu Editorial Board chungah a lawm thu sawiin, "Kum dang aia hmaah, kum danga kan souvenir lo tihchhuah tawh ṭhinte aia ṭha zawk bawk siin an rawn peih thei hi a lawmawm. Sum awm tam lo tak chungin hmasawn zawngin kan kal a ni," a ti a; kumina Chapchar Kût chu kum dang zawng aiin mipuiin an hlut nia a hriat thuleh, hun lo kal leh turah pawh ṭha lehzuala hman zel a nih a beisei thu a sawi.

Chapchar Kût souvenir tlangzarh inkhawm hi IPR director C Lalnunkima'n a kaihruai a, Editorial Board member Dr H Laldinmawia'n souvenir buatsaih dan leh chanchin tlangpui a tarlang.

Kumina Chapchar Kût souvenir-ah hi A4 size-a siam a ni a, ISBN a nei. Mi 13 thuziak dah niin, chung zinga pathum chu English-a ziah a ni a, thu ziaktu zingah hmeichhia pathum an tel. Mizoram chhung mai bakah, India ram chhung leh ram pawn thlenga Chapchar Kût hman dan tarlan a ni a, thlalak ṭhahnem tak dah a ni bawk.