IDSP-in Covid-19 hri thar leng avanga chiai loa fimkhur turin mipui an chah

May 29, Ningani khan Mizoramah Covid-19 vei mi pahnih hmuh chhuah an ni. Integrated Disease Surveillance Programme (IDSP), Mizoram chuan thuchhuah siamin, Covid-19 hri lêng thar vanga chî-âi lo tur leh fimkhur turin Mizoram mipui an chah.

Mizoram IDSP tarlan danin, tun hnaiah Mizoramah Covid-19 vei thar mi pahnih hmuh chhuah a ni a, Zoram Medical College & Hospital-ah enkawl mek niin, ngaihtuahawm an ni lo.

Tun hnaiah India ram hmun ṭhenkhatah Covid-19 variant JN.1, XFG leh LF.7.9 positive case hmuh chhuah a nih chungchangah IDSP chuan thuchhuah siamin, chîâi lo turin mipui an ngen a, "Tun dinhmunah Covid-19 hri kaite hi na lutuk an awm loh avangin in lamah enkawl an ni tlangpui," an ti.

IDSP tarlan danin, Covid-19 lêng chhui hna IDSP leh Indian Council of Medical Research (ICMR) kaltlangin National Surveillance System-in chhum lo chat loin an la kalpui reng a; swab sample test pawh a awm zauh zauh a ni.

Tuna Covid-19 positive hmuh chhuah leh hmaa Mizorama Covid-19 positive awm hnuhnun ber chu October 2024 kha a ni a, kum kal ta 2024 chhunga Mizorama Covid-19 vei zawng zawng chu mi 73 niin, thihpui an awm lo.

May 29, 2025 Ningani thleng khan Mizoramah swab sample 19,97,523 endik tawh niin, Covid positive 2,39,637 hmuh a ni tawh a; positive zinga 2,38,901 chu dam taka an chhuah laiin, mi 734 an thi a ni.