Aizawl district-ah thing 1,000 tal phun rêl a ni

Aizawl District Committee on Green Mizoram Day chu nimin khan DC conference hall-ah an chairman Lalhriatpuia, bawrhsap hoin an ṭhukhawm a; Aizawl district-a Green Mizoram Day hman dan tur rêlin, kumin hian Aizawl district-ah thing ṭiak 1,000 tal phun ni se, an ti.

Kumina Green Mizoram Day chu Aizawl district pualin Toofani Hall, Assam Rifle complex, Zokhawsangah June 11, 2025-ah hman ni se an ti a; thing ṭiak 1,000-tal phun tum ni se an tih bakah, Herhse phun uar ni se, an ti. Aizawl district-a kângmei veng ṭhate hnenah Fire Prevention Award sem an rêl bawk.

Aizawl district puala Green Mizoram Day hmannaah khuallian atan MLA Baryl Vanneihsangi leh khualzahawm atan Assam Rifles 23 Sector Brig. Bhispendra Sorayan sàwm an rel. KṬP Youth Recreation Centre, Falkland Vengah leh hmun hrang hrangah DFO, Aizawlin thing phun tur mipui mamawh ang zelin ngaihtuahsak te, environmental NGO-te nen local cable TV leh DDK-ahte talk show neihte an rel bawk.

Meeting-a rel danin, mimal, pawl leh department anga thing ṭiak phun tur mamawh tan June 2, 2025 aṭangin Aizawl DFO office-ah lak thei a ni dawn a; Aizawl district chhunga RD block pathum - Tlangnuam, Aibawk leh Darlawnahte pawh Green Mizoram Day hman a ni ang.

Ṭhutkhawma tarlan danin, kum 2024 khan Aizawl district-ah Green Mizoram Day pualin thing ṭiak 538 phun a ni a, ṭiak 30,547 sem chhuah a ni.