KHAWTHLIR
Leimin enfiah
Home minister K Sapdanga leh Aizawl East-I bialtu MLA Lalthansanga, minister chuan nimin khan Aizawl East-I huam chhunga Ṭhuampui Veng leh Zemabawka leiminna hmun an tlawh a, leimin avanga harsatna tawkte an tawrhpui thu sawiin, sorkar anga tih theih an neih ang ang ti tura an inhuam thu an sawi.
Dan loa leivung paih sawiho
Serchhip additional DC Lalrinzuala hoin nimin khan DC meeting hall-ah Serchhip khaw chhunga leivung paihna tur hmun ni loa leivung paih ṭhin chungchang sawiho a ni. Leivung paihna hmun tur ni loa leivung paih ṭhin a awm tawh loh nan Serchhip District Truck Owners Association leh Serchhip District Pick-up Owners Association-te chu hmalakpui tura sawm an ni a; dan loa leivung paihte chu hrem theih a nih thu tarlan a ni bawk.
Fimkhur turin chah
Khawzawl district bawrhsap K Vanlalṭhiana chuan, fûrpui thleng mekah Khawzawl district mipui chu leimin laka nan in leh lo leh hmunhmate a ṭul anga thawm ṭha tur leh leimin hlauhawmna laite tarpauline-a khuh turin a chah. DC hian fimkhur tura hriattirna a tichhuak a; chhiatna thlengah engtik lai pawhin District Emergency Operation Centre phone number 6909136938 biak theih a nih thu a tarlang.
Sclerosis zirho
World Multiple Sclerosis Day pualin National Institute for Locomotor Disabilities - Regional Training Centre, Aizawl leh sorkar laipuia Department of Empowerment of Persons with Disabilities chuan nimin khan Laithangpuii College of Pharmacy Auditorium-ah zirlaite pualin sclerosis awareness an buatsaih. RIPANS Physiotherapy HoD Dr Muhammed Azzarudin-a'n thil pawimawhte a zirtir a ni. Sclerosis natna hi Mizote'n thazám (nerve) ṭha lo an tih zinga mi a ni a, taksa ral dotu (immune system) chak tawk loh vanga awm niin an tarlan.
CADS ruihhlo man zat
Central YMA hnuaia ruihhlo dotu, Central Anti Drug Squad CADS) chuan May 24-30, 2025 chhung khan heroin (no 4) hawng 191 leh tictac bûr 73 an man a; methamphetamine kg. 10 an man bawk. Ruihhlo man kaihhnawihah hian mi 30 an man a, chu'ng zinga pathum chu Excise & Narcotics hnenah hlanin, pakhat chu Police hnenah an hlan a ni.
Sikul châwl
Nimin khan zing aṭangin nasa taka ruah a sûr avangin district magistrate-te chuan sikul chawlh an puang. School Education department chuan May 29, Ningani kha sikul chawlhah a lo puang
tawh bawk.