Chaltlang Multi-Utility Centre hawng

Chaltlang Multi-Utility Centre sak thar chu nimin khan UDPA minister K Sapdanga'n a hawng. Centre hi cheng nuai 481 senga sak a ni a, a hawnnaah hian bialtu MLA Vanlalhlana, minister pawh a a tel.

UDPA Minister chuan, centre a hawn tâk sa turin sorkar pathum an inrawlh tih sawiin, "Keini hi a hmáwr báwktu kan han ni a, a lawmawm tak zet. UDPA department hian project hrang hrang kan nei nual mai a, hall te, futsal ground te, bazar-te leh thil chi hrang hrang hmalakna kan nei ṭeuh mai a, kan hmalakna zinga a hawn theih hmahruai zinga mi a ni," a ti.

Contractor-te sûlhnu a mâm a, mit a tlung tih sawiin K Sapdanga chuan, "Department-a ka thawhpuite an chhuanawm a, pisa hun lai ni loah pawh mamawh hun apianga koh leh ràwn dâwl an ni hi an fakawm tak zet. He centre hi mi tam takin eizawnna ngêlnghet an neih theihna hmun lo ni se, khawlai chei mawitu leh chawhmeh thianghlim min hluitu lo ni se tih hi kan beiseina a ni," a ti a; department leh khawtlang mipuite chu lungrual taka thawkho turin a chah.

Bialtu MLA Vanlalhlana pawhin thu sawiin, "Building changtlung tak UDPA department zara kan nei thei hi bialtu MLA ka nihna ang pawhin lawmawm ka ti hle. A enkawl zui kawngah khawtlangin mawh kan phur dawn a, fimkhur leh neitu thinlung pua enkawl turin ka sawm che u. ZPM hian vanneihna kan nei a, kan term chhung la rei lo takah hian ram tan thil lian tham tak tak kan ti thei hlauh mai," a ti.

Chaltlang Multi-Utility Centre hi January 12, 2021-ah sak ṭan a ni a, April 30, 2025 khan sak zawh a ni. Floor paruk a awm a, a hnuai ber chu sa zawrhna niin, mi 15 ṭhut theihna tur a ni a, chhawng hnihna chu lirthei dahna a ni. Chhawng dang pahnih chu chawhmeh zawrhna tur niin, seat 17 a awm dawn a, a chung berah conference hall a awm.