Sorkar sum sèn ang hùin hmasawnna a awm em tih inzawh a ṭul - RD Minister

Rural Development minister Prof. Lalnilawma chuan May 29, Niangni khan Darlawn Rural Development Block golden jubilee lawmna a hmanpui a; sorkarin Mizoram hmasawn nan sum tam tak a sèn tawh thu sawiin, sorkar sum sèn ang hùin hmasawnna a awm em tih inzawh ṭhin a ṭul thu a sawi.

Prof. Lalnilawma chuan, sorkarin Mizoram hmasawn nan sum tam tak a sèn tawh thu leh a sèn mek zel thu a sawi a, "Sorkarin sum a la sêng zel dawn. Kan sum sen ang hû hian hma kan sawn em tih hi Mizoram mipui hian kan inzawh a ngai. RD department chuan mirethei in nei lote in sakna tur scheme PMAY(G) a kalpui mek a, hei hi politics vang emaw, induhsakna vang emawa dawn leh inthun chi a ni lo. Mirethei, a dawng tur dik takin dawng mai se la, chumi tur chuan mipui kan ṭan rual a ṭul," a ti.

RD Block office-a thawkte chu mipui tana thawk an ni tih inhre reng tura chahin Lalnilawma chuan, "Min dawrtute tana dawr nuam leh an harsatna ngaithla a, kan theih anga sutkiansak turin theihtawp kan chhuah a ṭul," a ti a; mipui pawhin sorkar hnathawkte hawihhâwm taka an dawr thiam a ṭul thu a sawi.

RD Minister chuan, Darlawn RD Block-in golden jubilee a thlen theih chhan chu sorkarna lo chelhtu tawh te, MLA lo ni tawh te, RD block office-a lo thawk tawhte leh khawtlang mipui vang a nih thu a sawi a, "RD department kaltlang hian Mizoramah hna thawh a lo ni tawh a, tunah pawh thawh mek zek a ni. Duhthusamin hma la sawn lo mah ila, kan vaiin sorkar lam leh mipui lam lungrual taka theihtawp chhuahin, Mizoram hmasawn nan kan thawh a ngai a ni," a ti.

Jubilee lawmnaah hian Tuivawl bialtu MLA Lalchhandama Ralte, RD joint director Vanlalrova, MLA hlui RL Pianmawia, sorkar hotu te leh khawtlang hruaitute an tel.

Darlawn RD Block hi kum 1974-ah din niin, tuna BDO nen BDO 35 an awm tawh a, thawktu mi 69 an awm mek. A hnuaiah hian khaw 25 a awm mek a, village council 27 leh sub-village pakhat a awm a ni.